អក្សរ DS អានថា [deɛs] ដូចពាក្យបារាំង déesse ដែលមានន័យថាទេពធីតា។  ចាប់តាំងពីឆ្នាំ២០១៤ DS គឺជាម៉ាកតែម្ដង បង្កើតឡើងដោយក្រុមហ៊ុន CITROËN។ រថយន្ដ CITROËN ប្រភេទ DS ត្រូវបានផលិតប្រមាណជិត ១.៥លានគ្រឿង ពីឆ្នាំ១៩៥៥ ដល់ឆ្នាំ១៩៧៥ នៅតាមរោងចក្រនានានៅទ្វីបអឺរ៉ុប ដូចជាប្រទេសបារាំង បែលហ្ស៊ិក អង់គ្លេស និងព័រទុយហ្កាល់។

 

ប្រទេសកម្ពុជា ក៏ធ្លាប់មានរោងចក្រផលិតឡានរបស់ CITROËN ដែរ ដែលកាលណោះគឺជាកម្មសិទ្ធិរបស់ក្រុមហ៊ុនខ្មែរផលិតរថយន្ត ហៅកាត់ថា SKMA (Société Khmère de Montage Automobile)។ រោងចក្រនេះដំឡើងរថយន្ដ CITROËN ប្រភេទ 2 Chevaux ពីឆ្នាំ១៩៥៨ រហូតដល់ឆ្នាំ១៩៦២ នៅខេត្តព្រះសីហនុ ក្រោមការគ្រប់គ្រងរបស់លោក DESRUES Georges។ ទោះយ៉ាងណា ក្រោយសង្គ្រាមមិនមានសេសសល់រថយន្តម៉ាក CITROËN ដែលដំឡើងនៅកម្ពុជានោះទេ។ សូមជម្រាបដែរថា ទីតាំងចែកចាយរថយន្ដ CITROËN នៅរាជធានីភ្នំពេញនាសម័យសង្គមរាស្ត្រនិយម គឺលើវិថីព្រះវិហារ (ផ្លូវ៨២) សង្កាត់ស្រះចក ខណ្ឌដូនពេញ។ សព្វថ្ងៃនេះ គេនៅឃើញឈ្មោះ CITROËN នៅជាប់នឹងអគារនេះនៅឡើយ ប៉ុន្តែវាបានក្លាយជាទៅជាហាងកាហ្វេ និងបន្ទប់ជួលវិញ។

 

 

 

 

ក្រុមហ៊ុន CITROËN ក៏បានផ្ដល់ម៉ាស៊ីនសម្រាប់រថយន្ដម៉ាក Angkor ផលិតមុនសង្គ្រាម នៅខេត្តបាត់ដំបងដែរ។ ក្រុមហ៊ុន CITROËN ត្រូវបានបង្កើតឡើង នាឆ្នាំ១៩១៩ នៅប្រទេសបារាំង ដោយលោក CITROËN André។ សព្វថ្ងៃនេះ គឺជាកម្មសិទ្ធិរបស់ក្រុមសម្ព័ន្ធ PSA៕