លោកស្រី ខៃ ចិន្តា យល់ថា ផែនការអភិវឌ្ឍន៍នេះនឹងជំរុញទេសចរក្នុងខេត្តមណ្ឌលគិរី រួមទាំងខេត្តផ្សេងទៀត នៅតំបន់ឦសាន្ត ឱ្យមានកំណើនភ្ញៀវទេសចរ។ ទន្ទឹមនឹងការមើលឃើញផលវិជ្ជមាន ប្រធានសមាគមសណ្ឋាគារកម្ពុជារូបនេះ ក៏បារម្ភពីបញ្ហាបរិស្ថានដែរ។ លោកស្រី ចិន្តា ស្នើឱ្យក្រសួងពាក់ព័ន្ធ និងវិស័យឯកជន ពង្រឹងវិធានអនាម័យ

និងថែរក្សាបរិស្ថាន ដើម្បីទប់ស្កាត់ការបំពុលដល់ធនធានធម្មជាតិ។

 

លោកស្រី ខៃ ចិន្តា ពន្យល់យ៉ាងដូច្នេះថា៖ « ជាការពិតការអភិវឌ្ឍ តែងតែមានការប៉ះពាល់ដល់ ការអភិរក្ស។ តាមយោបល់ខ្ញុំក្រសួងពាក់ព័ន្ធទាំងអស់ដូចជា ក្រសួងទេសចរណ៍ ក្រសួងបរិស្ថាន ក្រសួងកសិកម្ម និងក្រសួងសុខាភិបាល ត្រូវចូលរួមដោយប្រទាក់ក្រឡាគ្នា ទប់ស្កាត់ការប៉ះពាល់ »។ 

 

លោកស្រី ចិន្តា ក៏ជំរុញវិស័យឯកជនឱ្យរក្សាអនាម័យតាមសណ្ឋាគារ ផ្ទះសំណាក់ និងអាហារដ្ឋានរបស់ខ្លួន កុំឱ្យមានសំរាមរាត់រាយ ដែលនាំឱ្យភ្ញៀវឈប់ប្រើសេវាកម្មទេសចរណ៍នេះ។

 

ក្រសួងទេសចរណ៍ បានកំណត់ទិសដៅអាទិភាពចំនួន៦ ក្នុងការអភិវឌ្ឍមណ្ឌលគិរី ដើម្បីឱ្យក្លាយទៅជាខេត្តអេកូទេសចរណ៍លំដាប់ថ្នាក់អន្តរជាតិ ជាពិសេសទាក់ទាញទេសចរជាតិចំនួន ២លាននាក់ និងអន្តរជាតិ៩០ម៉ឺននាក់ ទៅកាន់ខេត្តមណ្ឌលគិរី នៅឆ្នាំ២០៣៥។ សូមជម្រាបផងដែរថា ផែនការអភិវឌ្ឍមណ្ឌលគិរីរយៈពេល១៥ឆ្មាំ (២០២១-២០៣៥) នឹងអាចរកចំណូលពីភ្ញៀវទេសចរប្រមាណ ៥០០លានដុល្លារ និងអាចផ្ដល់ការងារដល់ ប្រជាជនបានរហូតដល់៨ម៉ឺនកន្លែង៕