សម្រាប់ជំនួប Head to Head រវាងក្រុមទាំងពីរ អ៊ីតាលីឈ្នះ១០លើក អង់គ្លេសឈ្នះ៨លើក និងស្មើគ្នា៩លើក។ នាជំនួបមិត្តភាពពីរលើកចុងក្រោយកាលពីឆ្នាំ២០១៥ និងឆ្នាំ២០១៨ ក្រុមទាំងពីរបញ្ចប់ក្នុងលទ្ធផលស្មើ ១-១ ទាំងពីរលើក។

 

ក្នុងព្រឹត្តិការណ៍ Euro 2020 នេះ អង់គ្លេសបានលេខ១ពូល D ក្រោយឈ្នះក្រូអាស៊ី ១-០ ស្មើស្កុតឡែន 0-0 និងឈ្នះសាធារណរដ្ឋឆែក ១-០។ តោកំណាចបានទម្លាក់អាល្លឺម៉ង់ ២-០, អ៊ុយក្រែន ៤-០ និងដាណឺម៉ាក ១-០ ជាបន្តបន្ទាប់មុនឡើងទៅប្រជែងពានជាមួយអ៊ីតាលី។

ក្រុមអ៊ីតាលីត្រូវអវត្តមានខ្សែការពារ Leonardo Spinazzola ដោយសាររបួសកែងជើង។ សម្រាប់លោក Roberto Mancini ដែលជាគ្រូបង្វឹក ការឈានដល់វគ្គផ្តាច់ព្រ័ត្រ ជាលទ្ធផលនៃការប្រឹងប្រែងដ៏យូរ។ លោកបានលើកឡើងថា៖ «អង់គ្លេសមានអ្នកគាំទ្រពេញកីឡដ្ឋាន ដូច្នេះយើងត្រូវតែព្យាយាមដាក់សម្ពាធលើពួកគេ។ ការប្រកួតវគ្គផ្តាច់ព្រ័ត្រ អាចខុសពីវគ្គមុនៗខ្លះ យើងលេងដោយប្រឹងប្រែង តែក៏លេងដោយរីករាយផងដែរ»។
 

ប្រធានក្រុមអ៊ីតាលី Girogio Chiellini បានអះអាងថា៖ «យើងមានស្មារតីខ្ពស់ វានឹងក្លាយជាពេលវេលាដែលយើងត្រូវយកចិត្តទុកដាក់ឲ្យបានខ្លាំង។ ការប្រកួតបែបនេះ ក៏នឹងមិនអាចមានសម្រាប់ខ្ញុំម្តងទៀតក្នុងអាជីពរបស់ខ្ញុំនោះដែរ»។

 

រីឯអង់គ្លេសឯណោះវិញ ក្រៅពី Phil Foden ដែលមានបញ្ហារបួសបន្តិចបន្តួច កីឡាករទាំងអស់សុទ្ធតែ មិនមានបញ្ហា។ គ្រូបង្វឹក លោក Gareth Southgate  បានលើកឡើងថា ច្បាស់ណាស់ គ្រប់ក្រុមទាំងអស់នឹងមិនអាចឲ្យកីឡាករទាំង២៦នាក់មានឈ្មោះជុំគ្នាដដែលនោះឡើយ។ ដូច្នេះពួកគេត្រូវតែរួមគ្នាបង្កើតនូវមរតកដ៏អស្ចារ្យសម្រាប់ក្រុម»។