បើតាមការផ្សារយរបស់ទស្សនាវដ្តី Forbes អ្នកចាំទីដែលជាប់ជាកីឡាករល្អបំផុតប្រចាំព្រឹត្តិការណ៍ Euro 2020 យល់ព្រមផ្តល់កិច្ចសន្យារយៈពេលប្រាំឆ្នាំជាមួយ PSG ក្នុងតម្លៃ ៧០ លានដុល្លារអាមេរិក ។
 

កិច្ចព្រមព្រៀងនេះ នាំឱ្យ Donnarumma វ័យ២២ឆ្នាំ ទទួលបានប្រាក់ឈ្នួល ១,២០លានដុល្លារក្នុងមួយខែរហូតដល់ឆ្នាំ ២០២៦ ដែលធ្វើឱ្យរូបគេក្លាយជាអ្នកចាំទីមានថ្លៃពលកម្មខ្ពស់បំផុតនៅក្នុងពិភពបាល់ទាត់នាពេលបច្ចុប្បន្ន។
 

អ្នកចាំទីដែលជួយអ៊ីតាលឈ្នះជើងឯកអឺរ៉ុបឆ្នាំ២០២០ បានខកខានចរចាលើកកិច្ចសន្យាថ្មីជាមួយ AC Milan ដែលធ្វើឱ្យរូបគេចាកចេញពីទឹកដី San Siro ជាទីធ្លាប់រួមរស់៦ឆ្នាំ ដោយគ្មានតម្លៃខ្លួន។
 

មកទល់ពេលនេះក្លិបយក្សបារាំង ក្រោមការគ្រប់គ្រងរបស់អ្នកចាត់ការទូទៅលោក Mauricio Pochettino យកបានកីឡាករសំខាន់ៗចំនួន៤រូបហើយ ដើម្បីជួយក្រុមប្រជែងពានលំដាប់កំពូលដូចជា Ligue 1 និង Champions League រដូវកាលថ្មីខាងមុខនេះ។ កីឡាករទាំង៤រូបរួមមាន Georginio Wijnaldum ពី Liverpool ដោយគ្មានតម្លៃខ្លួន ខ្សែការពារ Sergio Ramos ផុតកិច្ចសន្យាជាមួយ Real Madrid រួមជាមួយខ្សែការពារ Achraf Hakimi ពី Inter Milan ក្នុងតម្លៃផ្ទេរ ៧១លានដុលា្លរអាមេរិក និង Donnarumma៕