ជាតិ
អាជ្ញាធរ ហាមក្រុមម៉ូតូបំពាក់សារ៉ែន ជិះបើកផ្លូវឲ្យរថយន្តសង្គ្រោះបន្ទាន់ កុំធ្វើសកម្មភាពទៀត ក្រុមម៉ូតូបំពាក់សារ៉ែន ជិះបើកផ្លូវឲ្យរថយន្តសង្គ្រោះបន្ទាន់ នៅតាមសាធារណៈ។ រូបពីគណនីហ្វេសប៊ុក ពេជ្រពេជ្រ កម្ពុជាតេជោសន្តិភាព
× ភ្នំពេញ៖ ស្នងការដ្ឋាននគរបាលធានីភ្នំពេញ បានដកហូតសម្ភារៈ និងណែនាំឲ្យក្រុមអ្នកបើកម៉ូតូបំពាក់សារ៉ែន ដែលតែងតែជិះបើកផ្លូវឲ្យរថយន្តសង្គ្រោះបន្ទាន់ បញ្ឈប់សកម្មភាពជាបន្ទាន់ ដើម្បីរក្សាសណ្ដាប់ធ្នាប់សាធារណជូនពលរដ្ឋ។ នេះបើតាមលោក សាន សុខសីហា អ្នកនាំពាក្យស្នងការរាជធានីភ្នំពេញ។
លោក សាន សុខសីហា បញ្ជាក់ថា មូលហតុដែលនាំឱ្យហាមឃាត់ ក្រុមម៉ូតូបើកផ្លូវឲ្យរថយន្តសង្គ្រោះបន្ទាន់នេះ ដោយសារមានពលរដ្ឋជាច្រើននាក់មានការមិនពេញចិត្ត និងរាយការណ៍ទៅស្នងការដ្ឋាននគរបាលរាជធានីភ្នំពេញ។ បើតាមលោក សីហា សមត្ថកិច្ចបានការហាមឃាត់ក្រុមម៉ូតូបើកផ្លូវនេះ កាលពីថ្ងៃទី១២ កក្កដា។
ក្នុងកិច្ចសម្ភាសន៍ជាមួយសារព័ត៌មានថ្មីៗតាមទូរស័ព្ទនៅថ្ងៃទី១៥កក្កដា អ្នកនាំពាក្យស្នងការរាជធានីភ្នំពេញរូបនេះ បាននិយាយយ៉ាងដូច្នេះថា៖ «យើងអនុវត្តតាមការណែនាំរបស់សាលារដ្ឋបាលរាជធានីភ្នំពេញ និងស្នងការរាជធានីភ្នំពេញ ដើម្បីបញ្ឈប់សកម្មភាព ណែនាំ និងដកហូតសម្ភារៈមួយចំនួន។ ព្រោះយើងមើលទៅឃើញពលរដ្ឋខល(ហៅទូរស័ព្ទ)មកកម្លាំងស្នងការដ្ឋានរាជធានីភ្នំពេញ រិះគន់ជុំវិញបញ្ហាក្រុមជិះម៉ូតូបើកផ្លូវហ្នឹង។ លើសពីនេះ វាបាត់បង់សណ្ដាប់ធ្នាប់ បង្កបញ្ហាដល់អ្នកដំណើរផ្សេងទៀត ក្នុងការធ្វើចរាចរណ៍»។
អ្នកនាំពាក្យរូបនេះ អះអាងថា ក្រុមអ្នកជិះម៉ូតូបំពាក់សារ៉ែនបើកផ្លូវឲ្យរថយន្តសង្គ្រោះបន្ទាន់នេះ បានធ្វើសកម្មភាពកន្លងមក ដោយគ្មានការអនុញ្ញាត ឬគ្មានការស្នើសុំច្បាប់ពីខាងណាឡើយ។ «ករណីនេះ បើមានការអនុញ្ញាតត្រឹមត្រូវ ក្រោមការណែនាំពីរដ្ឋបាលរាជធានីភ្នំពេញនិងខាងស្នងការដ្ឋាននគរបាលទើប មិនមែនជាបញ្ហាចោទ ។ហើយករណីក្រុមទាំងនេះ នៅតែបន្តសកម្មភាពសមត្ថកិច្ចនឹងចាត់វិធានការតាមផ្លូវច្បាប់។ នេះជាការបញ្ជាក់របស់លោក សាន សុខសីហា៕
© រក្សាសិទ្ធិដោយ thmeythmey.com