គម្រោងនេះ មានរយៈពេល ៥ឆ្នាំ ដោយចាប់អនុវត្តពីឆ្នាំ២០១៧ ដល់ឆ្នាំ២០២២។ លោករដ្ឋមន្រ្តីកសិកម្ម ជំរុញឱ្យក្រសួង ស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់ ដៃគូអភិវឌ្ឍន៍ វិស័យឯកជន សហគមន៍កសិកម្ម និងសមាគមកសិកម្ម រួមគ្នាដោះស្រាយរាល់បញ្ហាប្រឈមនានា ទាក់ទងនឹងផលិតកម្មស្រូវ និងសហការអនុវត្តគោលនយោបាយនេះឱ្យបានប្រសើរ។


រូបភាពពីហ្វេសប៊ុកលោក វេង សាខុន រដ្ឋមន្ត្រីក្រសួងកសិកម្ម 

លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងបែបនេះ នៅលើគណនីយហ្វេសប៊ុកផ្ទាល់របស់លោក៖«ការអនុវត្តគម្រោងនេះ រួមចំណែកយ៉ាងសំខាន់ ក្នុងការកែលម្អ និងលើកកម្ពស់គុណភាពគ្រាប់ពូជស្រូវ ធានាបានប្រសិទ្ធិភាពផលិតកម្ម និងសេដ្ឋកិច្ច កាត់បន្ថយការនាំចូល»។

 

 

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ក្នុងឆមាសទី១ ឆ្នាំ២០២១ កម្ពុជា បាននាំអង្ករ ទៅកាន់ទីផ្សារអន្តរជាតិ សរុប ២៨០ ៤៥០តោន ថយចុះ ២៩,៤៧ភាគរយ។ រីឯ ការនាំចេញស្រូវ សរុប ១ ៦៩២ ៨១៣តោន កើនឡើង ៧២,១២ភាគរយ៕