ព្រឹត្តិការណ៍កីឡាអូឡាំពិករដូវក្ដៅក្រុងតូក្យូ នឹងចាប់ផ្ដើមពីថ្ងៃទី២៣ ខែកក្កដា សប្ដាហ៍ក្រោយទៅក្រោយពន្យារពេលជាងមួយឆ្នាំមកដោយសារជំងឺកូវីដ-១៩ ។ អត្តពលិករាប់ពាន់នាក់មកពីជុំវិញពិភពលោក បានធ្វើដំណើរទៅដល់ទឹកដីជប៉ុនជាបន្តបន្ទាប់ដើម្បីចូលរួមប្រកួតក្នុងព្រឹត្តិការណ៍ដ៏ធំដែលរៀបចំឡើងរៀងរាល់បួនឆ្នាំម្ដង។

 

ប៉ុន្តែមួយសប្ដាហ៍មុនកម្មវិធីចាប់ផ្ដើម អ្នករៀបចំបែរជារកឃើញករណីឆ្លងជំងឺកូវីដ-១៩ ក្នុងភូមិកីឡា ដែលធ្វើឱ្យអត្តពលិកនាំគ្នាព្រួយបារម្ភពីការផ្ទុះករណីឆ្លងទ្រង់ទ្រាយធំណាមួយ។ លោក Masa Takaya អ្នកនាំពាក្យអ្នករៀបចំព្រឹត្តិការណ៍និយាយក្នុងសន្និសីទសារព័ត៌មាននៅថ្ងៃទី១៧ ខែកក្កដា ថា ករណីដំបូងកក្នុងភូមិកីឡា ត្រូវបានរកឃើញអំឡុងការត្រួតពិនិត្យប្រចាំថ្ងៃ។ លោកមិនផ្ដល់ព័ត៌មានលម្អិតឡើយ តែប្រព័ន្ធផ្សព្វផ្សាយជប៉ុនរាយការណ៍ថា ជាអ្នកមកពីបរទេស។

 

ទាក់ទងរឿងនេះ ប្រធានព្រឹត្តិការណ៍អូឡាំពិកតូក្យូ លោកស្រី Seiko Hashimoto និយាយដែរថា លោកស្រីយល់ពីការបារម្ភរបស់អត្តពលិកទាំងអស់ ដែលកំពុងប្រឈមមុខសម្ពាធច្រើនដូចជាការធ្វើតេស្តរាល់ថ្ងៃ និងសម្ពាធនៃការប្រកួតផង។ លោកស្រីសង្កត់ធ្ងន់ថា៖ «យើងនឹងធ្វើគ្រប់យ៉ាងដើម្បីបង្ការការផ្ទុះទ្រង់ទ្រាយធំ។ ប្រសិនបើនៅតែផ្ទុះ យើងមានផែនការឆ្លើយតប។»

 

ចំណែកនាយករដ្ឋមន្រ្តី ស៊ូហ្កា យូស៊ីហ៊ីដេ វិញ បង្ហាញសុទិដ្ឋិនិយមថា ព្រឹត្តការណ៍លើកនេះនឹងមកការរីករាយ ទោះត្រូវធ្វើដោយគ្មានទស្សនិកជនក្ដី។ លោក ស៊ូហ្កា ប្រាប់ទូរទស្សន៍ Nippon TV ថា ទោះគ្មានអ្នកមើល លោកនៅតែជឿថា វាជារឿងសំខាន់ក្នុងការបង្កើតការសប្បាយសម្រាប់ប្រជាជននៅជប៉ុន និងលើពិភពលោក៕