«មីតដុកទ័រ» ត្រូវបានបង្កើតឡើងរយៈពេល៤ឆ្នាំមកហើយ។ សហស្ថាបនិក មីតដុកទ័រលោក លឹម ដារ៉ាដេត បានឱ្យដឹងថា ការបង្កើតមីតដុកទ័រនេះ គឺក្នុងបំណងឱ្យពលរដ្ឋដែលនៅតំបន់ឆ្ងាយ ឬតាមបណ្ដាខេត្តដែលមានបញ្ហាសុខភាព អាចប្រឹក្សាជាមួយពេទ្យជំនាញបានយ៉ាងងាយស្រួល និងឆាប់រហ័ស។ 
 

លោក ប៊ុន តុងយី សហស្ថាបនិកមីតដុកទ័រ បានឱ្យដឹងថារយៈពេលកន្លងមក មីតដុកទ័រ បានទទួលសំណួរពីពលរដ្ឋប្រមាណជាង៣ម៉ឺនសំណួរ ដែលភាគច្រើនជាសំណួរទាក់ទងនឹងជំងឺកូវីដ-១៩ និងជំងឺសើស្បែក។ បើតាមលោក ប៊ុនតុងយី   ក្រៅពីអាចជួយឱ្យអ្នកជំងឺពិគ្រោះសុខភាពហើយនោះ មីតដុកទ័រ ក៏បានជួយណាត់គ្រូពេទ្យជំនាញ ដល់អ្នកជំងឺដែលត្រូវព្យាបាលផងដែរ។  «បើនិយាយពីអត្ថប្រយោជន៍ច្រើនលើសលប់ ព្រោះនៅកម្ពុជាយើង គ្រូពេទ្យគឺមិនទាន់គ្រប់ចំនួនទេ។ បើយើងក្រឡេកទៅមើលផ្នែក គ្រូពេទ្យឯកទេសវិញ នៅតាមខេត្ត មិនសូវមានច្រើនទេ។ អ៊ីចឹងការបង្កើតមីតដុកទ័រនេះឡើង គឺចង់ជួយប្រជាពលរដ្ឋដែលមិនទាន់ទទួលយកសេវាកម្មគ្រូពេទ្យឯកទេសពេញលេញ។ ជាពិសេសនោះកាត់បន្ថយការធ្វើដំណើរ ការចំណាយ ការស្នាក់នៅ ដោយពេលខ្លះគាត់មកស្វែងរកគ្រូពេទ្យពិបាកទៅទៀត»។ នេះជាការបញ្ជាក់របស់ លោក ប៊ុនតុងយី៕