ជាតិ
សង្គមជាតិ
សេដ្ឋកិច្ច
ចិន បន្តផ្តល់ជំនួយ២,៥លានដុល្លារទៀតដល់កម្ពុជា សម្រាប់បោសសម្អាតមីន រូបពី CMAC
× ភ្នំពេញ៖ រដ្ឋាភិបាលប្រទេសចិន សម្រេចផ្តល់ជំនួយឥតសំណងចំនួន២,៥លានដុល្លារ ដល់កម្ពុជា សម្រាប់គាំទ្រកិច្ចប្រតិបត្តិការរបស់មជ្ឈមណ្ឌលកម្ចាត់មីនកម្ពុជា (CMAC) ក្នុងការបោសសម្អាតគ្រាប់មីននិងសំណល់យុទ្ធភណ្ឌពីសង្គ្រាម។ នេះបើតាមលោក ហេង រតនា អគ្គនាយក CMAC។
តាមរយៈទំព័រហ្វេសប៊ុក លោក ហេង រតនា បានសរសេរថា នារសៀលថ្ងៃទី២០កក្កដា ថា ថវិកាឥតសំណងចំនួន២,៥លានដុល្លារ ដែលរដ្ឋាភិបាលប្រទេសចិនប្រគល់ឱ្យកម្ពុជានេះ គឺដើម្បីគាំទ្រដល់សកម្មភាពបោសសម្អាតមីន និងសំណល់ជាតិផ្ទុះពីសង្គ្រាម នៅក្នុងខេត្តចំនួន៧ ដែលនឹងអនុវត្តចាប់ពីខែមករា ដល់ខែធ្នូ ឆ្នាំ២០២២។ លោក បញ្ជាក់ថា៖«គម្រោងបោសសម្អាតមីន ដែលស្ថិតនៅក្រោមជំនួយរបស់រដ្ឋាភិបាលចិននេះ តាមផែនការ នឹងរំដោះផ្ទៃដីចម្ការមីន-ចម្ការសំណល់ជាតិផ្ទះពីសង្រ្គាម បានជាង១,៧០០ហិកតា»។
បើតាមលោក ហេង រតនា កញ្ចប់ថវិកាដែលកម្ពុជាទទួលបានពីចិនសម្រាប់បោះសម្អាតគ្រាប់មីនក្នុងរយៈពេលពេញមួយឆ្នាំនៃឆ្នាំ២០២២ខាងមុននេះ នឹងអនុវត្តដោយកងឯកភាពកម្ចាត់មីនទី៦ មាននៅខេត្តព្រះវិហារ ឧត្តរមានជ័យ ស្ទឹងត្រែង និងកងឯកភាពកម្ចាត់មីនទី៤ មានខេត្តសៀមរាប និងខេត្តកំពង់ធំ ដោយមានកម្លាំងប្រតិបត្តិការសរុប ជិត៣០០នាក់។
អគ្គនាយក CMAC រូបនេះ បានរម្លឹកថា កាលពីឆមាសទី១ ឆ្នាំ២០២១ អង្គភាព CMAC រំដោះដីចម្ការមីន និងគ្រាប់សំណល់ជាតិផ្ទុះ បានជិត១០៨៣ហិកតា និងរុករកឃើញហើយកំទេចគ្រាប់មីននិងសំណល់ជាតិផ្ទុះពីសង្គ្រាមជាង៥០០០គ្រាប់ តាមជំនួយថវិការបស់ចិនប្រមាណ២លានដុល្លារ៕ © រក្សាសិទ្ធិដោយ thmeythmey.com