អន្តរជាតិ
តុលាការកំពូលហ្វីលីពីន៖ ICC នៅតែអាចកាត់ទោសមន្រ្តីរដ្ឋាភិបាលបាន លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ។ រូបភាព៖ AP
× តុលាការកំពូលហ្វីលីពីន បានសម្រេចថា តុលាការព្រហ្មទណ្ឌអន្តរជាតិ (ICC) អាចកាត់ទោស មន្រ្តីរដ្ឋាភិបាលពីបទឧក្រិដ្ឋកម្ម ដែលបានប្រព្រឹត្តមុនពេលហ្វីលីពីនដកខ្លួនចេញពីតុលាការអន្តរជាតិមួយនេះ។ ការសម្រេចបែបនេះ ផ្ទុយទៅនឹងការអះអាងរបស់លោកប្រធានាធិបតី រ៉ូឌ្រីហ្គោ ឌូទើតេ ដែលយល់ថា តុលាការ ICC គ្មានយុត្តាធិការមកលើហ្វីលីពីន ព្រោះហ្វីលីពីនបានដកខ្លួនចេញរួចហើយ។
ក្នុងសេចក្តីសម្រេចមួយដែលធ្វើឡើងកាលពីខែមីនា តែទើបចេញផ្សាយជាសាធារណៈ នៅថ្ងៃទី២១ ខែកក្កដា តុលាការកំពូលហ្វីលីពីន បានលើកឡើងថា ICC នៅតែមានយុត្តិការកាត់ទោសមន្រ្តីរដ្ឋាភិបាលហ្វីលីពីនចំពោះបទឧក្រិដ្ឋកើតមុនឆ្នាំ២០១៩។
«បើទោះហ្វីលីពីនបានដាក់លិខិតូបករណ៍ដកខ្លួនចេញក៏ដោយ ហ្វីលីពីន មិនអាចគេចពីនីតិវិធីព្រហ្មទណ្ឌបានឡើយ»។ អង្គចៅក្រមដែលសមាជិកចំនួន១៥រូប នៃតុលាការកំពូលហ្វីលីពីន បានសង្កត់ធ្ងន់បែបនេះ ដោយបន្ថែមថា នីតិវិធី ដែលផ្តើមមុនពេលសមាជិកតុលាការ ICC ដកខ្លួនចេញ អាចចាប់បង្ខំឱ្យរដ្ឋទាំងនោះសហការជាមួយបាន។
សេចក្តីសម្រេចដដែលនេះ បានបន្តថា តុលាការព្រហ្មទណ្ឌអន្តរជាតិ នៅតែមានយុត្តាធិការ គ្រប់បទឧក្រិដ្ឋទាំងអស់ ដែលប្រព្រឹត្តដោយសមាជិករដ្ឋាភិបាលហ្វីលីពីនរហូតដល់ថ្ងៃទី១៧ ខែមីនា ឆ្នាំ២០១៩។ បានន័យថា តុលាការ ICC អាចកាត់ទោសអ្នកប្រព្រឹត្តបទល្មើសមុនខែមីនា ឆ្នាំ២០១៩នោះ។
ការចេញផ្សាយសេចក្តីសម្រេចរបស់តុលាការកំពូល ធ្វើឡើងបន្ទាប់ពី ICC នៅខែមិថុនាកន្លងមក បានស្វះស្វែងរកការស៊ើបអង្កេតពេញលេញមួយ ទាក់ទិននឹងឧក្រិដ្ឋកម្មប្រឆាំងមនុស្សជាតិ ក្នុងពេលរដ្ឋាភិបាលហ្វីលីពីនបើកយុទ្ធនាការ សង្រ្គាមប្រឆាំងនឹងគ្រឿងញៀនពីឆ្នាំ២០១៦ ដល់ឆ្នាំ២០១៩។
យ៉ាងណាមិញ រដ្ឋាភិបាលហ្វីលីពីន បានបដិសេធ មិនសហការជាមួយតុលាការ ICC ឡើយ ដោយចាត់ទុកជារឿងមិនត្រឹមត្រូវ។ ហ្វីលីពីន ក៏ដកសមាជិកភាពពី ICC នៅក្នុងឆ្នាំ២០១៩ បន្ទាប់ពីតុលាការអន្តរជាតិមួយនេះ បានបើកការស៊ើបអង្កេតបឋមមួយនៅក្នុងយុទ្ធនាការប្រឆាំងគ្រឿងញៀនរបស់ហ្វីលីពីន។
កន្លងមក ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ បានច្រានចោលម្តងហើយម្តងទៀតថា ICC គ្មានអំណាច ក្នុងការស៊ើបអង្កេតលើរូបលោកឡើយ ហើយហ្វីលីពីន ក៏មិនសហការជាមួយការស៊ើបអង្កេតខុសច្បាប់នោះដែរ៕
© រក្សាសិទ្ធិដោយ thmeythmey.com