ភ្នំពេញ៖ ចិន ច្រានចោលព័ត៌មានដែលផ្សាយថា ចិនបានលួចទិន្នន័យទន្លេមេគង្គ ពីក្រសួងការបរទេស និងសហប្រតិបត្តិការអន្តរជាតិកម្ពុជា។ ការបដិសេធនេះ ធ្វើឡើងតាមរយៈស្ថានទូតចិនប្រចាំកម្ពុជា នាយប់ថ្ងៃទី២២ កក្កដា។
ស្ថានទូតចិន បានបញ្ជាក់ថា រដ្ឋាភិបាលចិនប្រឆាំងជាដាច់ខាត និងតែងបង្ក្រាបលើការវាយប្រហារគ្រប់ទម្រង់នៅក្នុងប្រព័ន្ធអ៊ីនធឺណិត។ ចិនមិនដែលលើកទឹកចិត្ត គាំទ្រ ឬអនុគ្រោះចំពោះការវាយប្រហារ របស់ក្រុម Hackerឡើយ។ ចិន ចាត់ទុកការចុះផ្សាយថា ក្រុម Hacker ចិនបានលួចទិន្នន័យទន្លេមេគង្គពីក្រសួងការបរទេសកម្ពុជា ជាព័ត៌មានបំភ្លៃការពិត។
ស្ថានទូតចិនប្រចាំកម្ពុជា បានសរសេរលើហ្វេសប៊ុកឆ្លើយតបដូច្នេះថា៖«ស្ថានទូតចិនប្រចាំកម្ពុជា សម្តែងការព្រួយបារម្ភខ្លាំង និងប្រឆាំងជាដាច់ខាត ចំពោះការលើកឡើងខាងលើនេះ»។
កាលពីថ្ងៃទី១៩ កក្កដា ក្រសួងយុត្តិធម៌អាមេរិក បានចោទប្រកាន់ជនជាតិចិន៤នាក់ថា បានលួចទិន្នន័យសម្ងាត់ពីស្ថាប័នរដ្ឋកម្ពុជា ពាក់ព័ន្ធនឹងកិច្ចពិភាក្សាលើបញ្ហាទន្លេមេគង្គ កាលពីអំឡុងឆ្នាំ២០១៨។ រាល់ទិន្នន័យដែលចិនលួចពីកម្ពុជានេះ គឺតែងតែដាក់ចូល «Domain 6 » ដែលមានលេខសម្ងាត់ថា «មនុស្សល្អ» (Good Person)។ ក្រៅពីកម្ពុជា ចិនក៏បានលួចទិន្នន័យ និងព័ត៌មានឯកជនក្នុងប្រទេសផ្សេងទៀតដែរ។
បើតាមក្រសួងយុត្តិធម៌អាមេរិកដដែល ក្នុងចំណោមជនជាតិចិន៤រូបនោះ គឺមាន៣នាក់ បម្រើការងារនៅក្នុងក្រសួងសន្តិសុខរដ្ឋចិន នៃខេត្តហៃណាន (Hainan) រួមមានឈ្មោះ Ding Xiaoyang , Cheng Qingmin និង Zhu Yunmin ។
តែយ៉ាងណាចិន ចាត់ទុកព័ត៌មានរបាយការណ៍អាមេរិកនេះ ជាការញុះញង់ និងចោទប្រកាន់ចិនប៉ុណ្ណោះ។ បន្ថែមពីនេះ ចិនក៏បានផ្លែផ្កាវិញថា ការលួចទិន្នន័យពីប្រទេសដទៃ គឺមានតែអាមេរិកទេ ដែលពូកែប្រព្រឹត្តទង្វើបែបនេះ។
«នៅលើពិភពលោកនេះ សហរដ្ឋអាមេរិក គឺជាប្រភពនៃការវាយប្រហារតាមប្រព័ន្ធអ៊ីនធឺណិតដ៏ធំបំផុត ហើយទង្វើនៃការលួចតាមដានស្តាប់របស់ប្រទេសមួយនេះ សូម្បីតែ “សម្ព័ន្ធមិត្ត” ក៏មិនលើកលែងដែរ។ រីឯចំពោះបញ្ហាសន្តិសុខអ៊ីនធឺណិតវិញ ទំនុកចិត្តទៅលើសហរដ្ឋអាមេរិក ត្រូវបានបាត់បង់យូរមកហើយ។ ប្រទេសនេះ តែងពោលពាក្យចចាមអារ៉ាមផ្ដេសផ្ដាស ចោរស្រែកចាប់ចោរ ញុះញង់គេឯង…។ ការប្រឌិតមិនពិតខាងលើនេះ ក្រៅពីកុហកខ្លួនឯង និងអ្នកដទៃ គ្មានគុណតម្លៃអ្វីនោះទេ»។ នេះបើតាមសំណេរជាភាសាចិន និងខ្មែរ ដែលស្ថានទូតចិន លើទំព័រហ្វេសប៊ុក។
ជុំវិញករណីលួចទិន្នន័យនេះ សារព័ត៌មានថ្មីៗ មិនទាន់អាចទាក់ទងអ្នកនាំពាក្យក្រសួងប្រៃសណីយ៍ និងទូគមនាគមន៍ ដើម្បីសុំការអត្ថាធិប្បាយ តបនឹងរបាយការណ៍អាមេរិកនេះឡើយ។ ប៉ុន្តែអ្នកនាំពាក្យរដ្ឋាភិបាល លោក ផៃ ស៊ីផាន យល់ថា ការចោទរបស់អាមេរិកលើភាគីចិននេះ មិនមែនជាការពិតទេ ព្រោះរាល់ទិន្នន័យទាក់ទងនឹងទន្លេមេគង្គនេះ គឺរដ្ឋាភិបាលកម្ពុជា បានបង្ហោះលើវេបសាយ និងបណ្ដាញអ៊ីនធឺណិតជាសាធារណៈ ហើយបុគ្គលណា ក៏អាចទាញយកទៅប្រើប្រាស់បានដែរ។
ថ្លែងប្រាប់សារព័ត៌មានថ្មីៗ លោក ផៃ ស៊ីផាន បាននិយាយដូច្នេះ៖«[អាមេរិក] គេចោទលើ [ការលួច] ទិន្នន័យទន្លេមេគង្គនៅប្រទេសកម្ពុជា ក៏ប៉ុន្តែទិន្នន័យនោះ គេដាក់បង្ហាញជាសាធារណៈ។ ដូច្នេះខ្ញុំមើលទៅ ការចោទ[របស់អាមេរិក]នេះ វាដូចជាមិនសម …។
ជាមួយគ្នានេះ អ្នកនាំពាក្យរដ្ឋាភិបាល បានអះអាងថា កម្ពុជាមានប្រព័ន្ធ និងរបៀបការងារគ្រប់គ្រង និងការពាររាល់ឯកសារសម្ងាត់នានា នៅតាមក្រសួង និងស្ថាប័នរដ្ឋទាំងអស់ ដោយមានក្រសួងមហាផ្ទៃ និងក្រសួងប្រៃសណីយ៍ ជាសេនាធិការគ្រប់គ្រងប្រព័ន្ធទិន្នន័យទាំងនោះ៕