សៀមរាប៖ អាជ្ញាធរខេត្តសៀមរាប បានប្រកាសឱ្យជនបរទេសរស់នៅក្រុងសៀមរាប ទៅទទួលការចាក់វ៉ាក់សាំងបង្ការជំងឺកូវីដ-១៩ ដោយឥតគិតថ្លៃ តាំងពីថ្ងៃទី២០ កក្កដា។ ៥ថ្ងៃនេះ មានជនបរទេសសរុប ១,៦២៦នាក់ ក្នុងនោះស្រី ៤៩៣នាក់ បានស្ម័គ្រចិត្តចាក់វ៉ាក់សាំង។

 

អនុប្រធានមន្ទីរពេទ្យបង្អែកខេត្តសៀមរាប និងជាប្រធានក្រុមការងារចាក់វ៉ាក់សាំងកូវីដ-១៩ លោក លឹម ហេង បានបញ្ជាក់ថា យុទ្ធនាការចាក់វ៉ាក់សាំងនេះ នឹងបន្តរហូតទាល់តែអស់ សម្រាប់ជនបរទេសដែលបានចុះឈ្មោះនៅរដ្ឋបាលក្រុងនេះ។ 

 

សូមបញ្ជាក់ថា ខេត្តសៀមរាបបានចាប់ផ្តើមចាក់វ៉ាក់សាំងទ្រង់ទ្រាយធំដល់ពលរដ្ឋក្រុងសៀមរាប ចាប់ពីថ្ងៃទី១០ កក្កដា មក ហើយរហូតមកដល់ពេលនេះ យុទ្ធនាការនេះបានរៀបចំនៅតាមបណ្ដាស្រុកនានាក្នុងខេត្ត ខណៈដែលជំងឺកូវីដ-១៩ បានរាលដាលតាមសហគមន៍គួរឱ្យបារម្ភ៕