COVID-19
ជាតិ
កុមារ និងយុវវ័យនៅភ្នំពេញ កណ្តាល កោះកុង និងព្រះសីហនុ បានចាក់វ៉ាក់សាំងកូវីដ-១៩មុនគេ
× កម្ពុជា ចាប់ផ្តើមចាក់វ៉ាក់សាំងបង្ការកូវីដ-១៩ ប្រភេទស៊ីណូវ៉ាក់(Sinovac)លើកុមារ និងយុវវ័យ ដែលមានអាយុចាប់ពី១២ឆ្នាំ ដល់អាយុក្រោម១៨ឆ្នាំ នៅថ្ងៃទី១ ខែសីហានេះ ដោយផ្តើមនៅរាជ ធានីភ្នំពេញ ខេត្តកណ្តាល កោះកុង និងខេត្តព្រះសីហនុ។ នេះបើតាមសេចក្តីជូនព័ត៌មានរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស(គ.វ.ក-១៩)។
បើតាមសេចក្តីជូនព័ត៌មានដដែល យុទ្ធនាការចាក់វ៉ាក់សាំងនៅរាជធានីភ្នំពេញ គ.វ.ក-១៩ បានរៀបចំទីតាំងចំនួន៥ សម្រាប់ការចាក់ដល់កូនចៅឥស្សរជន ដែលមានតួនាទីជាឧបនាយករដ្ឋមន្ត្រី ឬឋានៈ រហូតដល់មន្ត្រីរាជការ និងមន្ត្រីជាប់កិច្ចសន្យា, កូនចៅឧកញ៉ា មន្ត្រីទូត មន្ត្រីអង្គការសហប្រជាជាតិ តំណាងស្ថាប័នហិរញ្ញវត្ថុអន្តរជាតិ អង្គការអន្តរជាតិ អង្គការក្រៅរដ្ឋាភិបាល និងកូនចៅអ្នកសារព័ត៌មាន។ ទីតាំងទាំង៥នោះ មានមន្ទីរពេទ្យកាល់ម៉ែត, មន្ទីរពេទ្យព្រះអង្គឌួង, មន្ទីរពេទ្យគន្ធបុប្ផាភ្នំពេញ (វត្តភ្នំ) និងមជ្ឈមណ្ឌលជាតិគាំពារមាតា និងទារក និង មន្ទីរពេទ្យកុមារជាតិ
សម្រាប់ទីតាំងចាក់វ៉ាក់សាំងកូវីដ-១៩ របស់កូនចៅមន្ត្រីរាជការថ្នាក់ក្រោមជាតិ និងប្រជាបលរដ្ឋទូទៅនៅរាជធានីភ្នំពេញ គឺស្ថិតនៅទីតាំងចំនួន៤២ នៅក្នុងខណ្ឌទាំង១៤ ដែលរៀបចំដោយរដ្ឋបាលរាជធានីភ្នំពេញ។ នេះជាការបញ្ជាក់របស គ.វ.ក-១៩ ដែលបន្តទៀតថា រដ្ឋបាលរាជធានីភ្នំពេញ នឹងជូនដំណឹងពីកាលបរិច្ឆេទ និងទីតាំងចាក់វ៉ាក់សាំងជាបន្តបន្ទាប់ដល់ពលរដ្ឋ។
ដោយឡែកការផ្តល់វ៉ាក់សាំងកូវីដ-១៩ ដល់កុមារ និងយុវវ័យ នៅខេត្តកណ្ដាល កោះកុង និងខេត្តព្រះសីហនុ អាជ្ញាធរខេត្តនីមួយៗ ក៏នឹងជូនដំណឹងពីកាលបរិច្ឆេទ និងទីតាំងជាបន្ដបន្ទាប់ដែរ។
សូមជម្រាបថា កម្ពុជាបានត្រៀមវ៉ាក់សាំងប្រភេទ Sinovac ចំនួន៥លានដូស និង Johnson & Johnson ចំនួន១លានដូស សម្រាប់ចាក់ដល់កុមារ និងយុវវ័យ។
បច្ចុប្បន្ន កម្ពុជាមានវ៉ាក់សាំងបង្ការកូវីដ-៩ សរុប ១៧,៦៥៦,០០០ដូស សម្រាប់ចាក់ជូនប្រជាពលរដ្ឋ ក្នុងនោះវ៉ាក់សាំង Sinopharm មាន៦,២លានដូស, វ៉ាក់សាំងរបស់ក្រុមហ៊ុន ស៊ីណូវ៉ាក់មាន ១០,៥លានដូស និងវ៉ាក់សាំង CoviShield របស់ក្រុមហ៊ុន AstraZeneca មានចំនួន ៣៥៦,០០០ដូស។
គិតត្រឹមថ្ងៃទី២៦កក្កដា កម្ពុជាបានចាក់វ៉ាក់សាំងបង្ការជំងឺកូវីដ-១៩ ដល់ប្រជាពលរដ្ឋដែលមានដែលអាយុចាប់ពី១៨ឆ្នាំឡើង ជាង៦,៨លាននាក់ហើយ ដែលស្មើនឹង អត្រាជាង៦៨ភាគរយ នៃផែនការសរុប១០លាននាក់៕
© រក្សាសិទ្ធិដោយ thmeythmey.com