ចាប់ពីថ្ងៃទី១ ខែសីហាតទៅ ប្រជាជនដែលមិនទាន់បានទទួលវ៉ាក់សាំងបង្ការជំងឺកូវីដ-១៩ នឹងមិនអនុញ្ញាតឱ្យធ្វើដំណើរទៅបរទេសឡើយ ប៉ុន្តែអ្នកទាំងនោះ អាចទៅតែអាគាររដ្ឋាភិបាល មន្ទីរពេទ្យ មជ្ឈមណ្ឌលវិជ្ជសាស្រ្តឯកជន កន្លែងលក់ឱសថ, និងកន្លែងលក់អាហារជាដើម។ 

 

យ៉ាងណាមិញ វិធានការខាងលើ ត្រូវលើកលែងចំពោះមនុស្សអាយុក្រោម ១៦ឆ្នាំ, បុគ្គលដែលមានលិខិតបញ្ជាក់មិនអាចទទួលវ៉ាក់សាំងបង្ការជំងឺកូវីដ-១៩ បានពីក្រសួងសុខាភិបាល និងអ្នកមានផ្ទៃពោះ។ 

 

ក្នុងសេចក្តីថ្លែងការណ៍របស់រដ្ឋាភិបាល អ្នកដំណើរមកដល់ប្រទេសក្នុងតំបន់មជ្ឈិមបូព៌ាមួយនេះ ត្រូវធ្វើចត្តាឡីស័ករយៈពេល ៧ថ្ងៃ រហូតទាល់តែមានលទ្ធផលអវិជ្ជមាននៃជំងឺកូវីដ-១៩។ បន្ថែមពីនេះ អាជ្ញាធរអាកាសចរស៊ីវិល ក៏បានប្រកាសផងដែរថា អ្នកដំណើរមកកូវ៉ែតទាំងអស់ ត្រូវមានលទ្ធផលអវិជ្ជមាន មុនពេលហោះហើរ និងមិនមានចេញរោគសញ្ញាអ្វីទាំងអស់។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

ការប្រកាសខាងលើ ធ្វើឡើងស្របពេលរដ្ឋាភិបាលកូវ៉ែត បានបន្ធូរបន្ថយវិធានការទប់ស្កាត់កូវីដ-១៩ មួយចំនួន រួមទាំងបើកជើងហោះហើរ លើកលែងតែសកម្មភាពជួបប្រជុំប៉ុណ្ណោះ។ ចាប់ពីថ្ងៃទី១ ខែសីហាដដែល កូវ៉ែត នឹងបើកជើងហោះហើរដោយផ្ទាល់ទៅម៉ារ៉ុក និងម៉ាល់ឌីវ។ 

 

សូមបញ្ជាក់ថា ករណីឆ្លងជំងឺកូវីដ-១៩ នៅកូវ៉ែត មកទល់ពេលនេះ មានចំនួន ៣៩ម៉ឺនករណី និងអ្នកស្លាប់មានចំនួនជាង ២ពាន់នាក់។ ចំណែកអ្នកជាសះស្បើយមានចំនួនជាង ៣៧ម៉ឺននាក់។ កូវ៉ែត បានផ្តល់វ៉ាក់សាំងបង្ការជំងឺកូវីដ-១៩ យ៉ាងហោចណាស់ចំនួន ២,៣៨លានដូស ទៅប្រជាជនខ្លួន ដោយមនុស្សចំនួន ៩៣ម៉ឺននាក់ បានទទួលវ៉ាក់សាំងពេញលេញ។ កូវ៉ែតមានប្រជាជនសរុបជាង ៤លាននាក់៕