ដើម្បីចូលរួមដោះស្រាយបញ្ហាស្រូវជូនកសិករ ធនាគារ ARDB និងក្រសួងសេដ្ឋកិច្ច និងហិរញ្ញវត្ថុ បានផ្ដល់ឥណទានជាបន្តបន្ទាប់ ដល់រោងម៉ាស៊ីនកិនស្រូវ។ ដោយឡែក នៅក្នុងរដូវប្រមូលផលស្រូវខាងមុខនេះ ធនាគារក៏បានត្រៀមថវិកាមួយចំនួនធំ សម្រាប់បន្តផ្តល់ឥណទាន ដល់បណ្តារោងម៉ាស៊ីនកិនស្រូវ និងក្រុមហ៊ុនកែច្នៃ និងនាំចេញអង្ករ ដើម្បីប្រមូលទិញស្រូវ ពីប្រជាកសិករ ដែលកំពុងជួបនូវបញ្ហាទីផ្សារនេះ។

 

បើតាមលោក ចាន់ សីហា អ្នកនាំធនាគារអភិវឌ្ឍន៍ជនបទ និងកសិកម្ម ផែនការប្រមូលទិញស្រូវ ពីកសិករ របស់ធនាគារ ARDB មិនមែន ទើបតែចាប់ផ្ដើម ក្នុងវិបត្តិកូវីដ-១៩ នោះទេ ពោលចាប់ពី ឆ្នាំ២០១៦ មកម្លេះ។ លោក សីហា បានរៀបរាប់ប្រាប់សារព័ត៌មានThmeyThmey25 តាមទូរសព្ទបែបនេះ៖«រឿងនេះ យើងមិនមែន ទើបតែធ្វើទេ យើងធ្វើតាំងពី២០១៦ម្លេះ ហើយថវិកា ក៏មានស្រាប់ហើយដែរ។ ឆ្នាំនេះ ធនាគារក៏បានផ្ដល់ថវិកាដល់រោងម៉ាស៊ីនជាបន្តបន្ទាប់ហើយដែរ ដើម្បីប្រមូលទិញស្រូវពីកសិករ»។

ដ្បិតថា មិនបញ្ជាក់ពីទំហំថវិកា សម្រាប់ឆ្នាំនេះ តែអ្នកនាំពាក្យរូបនេះ បានបញ្ជាក់ថា ធនាគារនឹងជួយកសិករឱ្យលទ្ធភាពតាមដែលអាចធ្វើទៅបាន។ លោក សីហា បានបញ្ជាក់ទៀតថា រយៈពេល ៥ឆ្នាំ ក្នុងសកម្មភាពនេះ ធនាគារ ARDB បានទទួលថវិកា ២ដំណាក់កាលពីរដ្ឋាភិបាលកម្ពុជា។ ដំណាក់ទី១ ធនាគារទទួលបានថវិកា ៥០លានដុល្លារ និងដំណាក់កាលទី២ ធនាគារទទួលបានថវិកា ចំនួន ៣០លានដុល្លារ។ 

 

ស្ថិតក្នុងស្ថានភាពកំពុងរាតត្បាតខ្លាំងនៃជំងឺកូវីដ-១៩ តាមច្រកព្រំដែនកម្ពុជា-វៀតណាម មានការរាំងស្ទះក្នុងការនាំចេញស្រូវ ស្របពេលរដ្ឋាភិបាលកម្ពុជា បានដាក់ចេញវិធានការបិទខ្ទប់ ភូមិសាស្ត្រខេត្តចំនួន៨ ដែលជាប់ព្រំប្រទល់ប្រទេសថៃទៀតនោះ វាអាចធ្វើឱ្យវិស័យស្រូវ-អង្ករ កម្ពុជា កាន់តែចង្អៀត។ 

 

លោក ចាន់ សីហា បានបញ្ជាក់បន្ថែមបែបនេះ៖«បើយើងមើលពីស្ថានភាព បច្ចុប្បន្ន ដូចជាមានសភាពធ្ងន់ធ្ងរ វាដូចជាលើស សមត្ថភាពរបស់ធនាគារ។ តែយ៉ាងណា ធនាគារ នឹងជួយកសិករ ឱ្យអស់លទ្ធភាព»។ 

 

ជុំវិញនូវការលើកឡើងនេះ សហព័ន្ធស្រូវ-អង្ករ កម្ពុជា បានសាទរយ៉ាងខ្លាំង និងគាំទ្រចំពោះការលើកឡើងរបស់ធនាគារអភិវឌ្ឍន៍ជនបទ និងកសិកម្ម ខាងលើ។ លោក លន់ យ៉េង អគ្គលេខាធិការសហព័ន្ធស្រូវ-អង្ករ កម្ពុជា បាននិយាយដូច្នេះ«ខ្ញុំគាំទ្រពេញទំហឹង និងសូមអរគុណដល់រាជរដ្ឋាភិបាលកម្ពុជា ដែលតែងយកចិត្តទុកដាក់ និងជួយដោះស្រាយបញ្ហាជូនកសិករ»។ 

 

គួរបញ្ជាក់ថា ថ្មីៗនេះ កម្ពុជា បានជួបបញ្ហាធ្លាក់ចុះតម្លៃស្រូវ យ៉ាងខ្លាំង ដោយសារភាគីវៀតណាម បានបិទច្រកទ្វារព្រំដែនកម្ពុជា-វៀតណាម ព្រោះទប់ស្កាត់ការឆ្លងរាលដាលនៃជំងឺកូវីដ-១៩។ មូលហេតុនេះ បានធ្វើឱ្យកម្ពុជាមិនអាចនាំចេញស្រូវ ទៅវៀតណាម និងធ្វើឱ្យតម្លៃស្រូវកម្ពុជា ធ្លាក់ថ្លៃមកត្រឹម៦៥០រៀល ទៅ ៧០០រៀល ក្នុងមួយគីឡូក្រាម។

 

រយៈពេល ៦ខែ ក្នុងឆ្នាំ២០២១ កម្ពុជា បាននាំចេញ ប្រមាណ ១,៦លានតោន ទៅកាន់ទីផ្សារអន្តរជាតិ។ ក្នុងនោះ ប្រទេសវៀតណាម ជាទីផ្សារគោលដៅធំជាងគេ របស់កម្ពុជា។ នេះបើយោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ៕