កីឡាករ ប៉ែន សុគង់ គឺជាអត្តពលិកចុងក្រោយ ដែលប្រកួតតំណាងឱ្យកម្ពុជា ខណៈកីឡាករ និងកីឡាការិនី២រូបទៀត ធ្លាក់ពីការប្រកួតហែលទឹកសេរី ចម្ងាយ៥០ម៉ែត្រ នៅរសៀលថ្ងៃទី៣០ កក្កដា។ កីឡាករហែលទឹកកម្ពុជា ហែម ប៉ុច បានបំបែកកំណត់ត្រាខ្លួនឯង ក្នុងព្រឹត្តិការណ៍កីឡាអូឡាំពិកក្រុងតូក្យូ (Tokyo 2020)។ នៅក្នុង Heat 4 ហែម ប៉ុច សម្រេចបានក្នុង ២៤.៩១ វិនាទី ខណៈកំណត់ត្រាផ្ទាល់ខ្លួនកន្លងមករបស់គេ គឺ ២៤.៩២។
 

ចំណែកកីឡាការិនី ឃឿន ប៊ុនពេជ្រមរកត សម្រេចបាន ២៩.៤២វិនាទី លើវិញ្ញាសាហែលសេរីចម្ងាយ៥០ម៉ែត្រ ក្នុងព្រឹត្តិការណ៍កីឡាអូឡាំពិកក្រុងតូក្យូ។ នេះជាការបំបែកកំណត់ត្រា ខ្លួនឯង ដែលកន្លងមក គឺ២៩.៩៩វិនាទី។ ប៉ុន្តែលទ្ធផលកីឡាករ និងកីឡាការិនីទាំងពីរនេះ ធ្វើមិនបានល្អឡើយ បើធៀបនឹងអត្តពលិកហែលទឹកពីបណ្ដាប្រទេសផ្សេងទៀត។

ចំពោះវិញ្ញាសាហែលទឹកផ្នែកបុរស និងនារីនេះ គឺគណៈកម្មការវាយតម្លៃជ្រើសរើសកីឡាករ-កីឡាការិនី ដែលប្រើថិរវេលាតិចជាងគេតាមសេរី និង Heat នីមួយៗ ចំនួន ១៦នាក់ ឡើងវគ្គពាក់កណ្ដាលផ្ដាច់ព្រ័ត្រ មុននឹងឈានដល់កៅអីវគ្គផ្ដាច់ព្រ័ត្រ និងប្រជែងមេដាយ។
 

 
 

កម្ពុជាបានទទួលសិទ្ធិអនុគ្រោះបញ្ជូនអត្តពលិក ២ប្រភេទកីឡា គឺកីឡាករ-កីឡាការិនីហែលទឹក ២រូប និងកីឡាករអត្តពលកម្មម្នាក់ សម្រាប់ចូលរួមប្រកួតព្រឹត្តិការណ៍ Tokyo Olympic Games 2020 នៅប្រទេសជប៉ុន ។ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជានាយបេសកកម្ម ជាអ្នកដឹកនាំកីឡាករ-កីឡាការិនី៣រូប ចូលរួមប្រកួតព្រឹត្តិការណ៍នេះ៕