កីឡាអន្តរជាតិ
អន្តរជាតិ
កីឡាការិនីហែលទឹកអូស្ត្រាលី McKeon Emma ឈ្នះមេដាយ៧តែម្នាក់ឯងពីអូឡាំពិកតូក្យូ
× កីឡាការិនី McKeon Emma របស់អូស្ត្រាលី កំពុងក្លាយជាអត្តពលិកដែលឈ្នះមេដាយច្រើនជាងគេបំផុតពីព្រឹត្តិការណ៍កីឡាអូឡាំពិកក្រុងតូក្យូ (Tokyo 2020) ជាមួយនឹងមេដាយមាស៤ និងសំរឹទ្ធ៣។
កីឡាការិនីវ័យ២៧ឆ្នាំរូបនេះ បានក្លាយជាម្ចាស់កំណត់ត្រាអូឡាំពិកថ្មីលើវិញ្ញាសាហែលសេរីចម្ងាយ៥០ម៉ែត្រ ក្នុងថិរវេលា ២៣.៨១វិនាទី នាំមុខកីឡាការិនីស៊ុយអែត និងដាណឺម៉ាក។ កំណត់ត្រាថ្មីអូឡាំពិកដូចគ្នាផងដែរសម្រាប់វិញ្ញាសាហែលសេរីចម្ងាយ១០០ម៉ែត្រ ដោយ McKeon Emma ប្រើថិរវេលា ៥១.៩៦វិនាទី នាំមុខកីឡាការិនីហុងកុង និងកីឡាការិនីអូស្ត្រាលី១រូបទៀត។
មេដាយមាស២ទៀតរបស់ McKeon Emma គឺក្នុងវិញ្ញាសាហែលបណ្តាក់សេរី 4x100m និងវិញ្ញាសាហែលបណ្តាក់ 4x100m Medley។
រីឯមេដាយសំរឹទ្ធ៣ដែលកីឡាការិនីរូបនេះ ទទួលបានគឺក្នុងវិញ្ញាសា ហែលមេអំបៅចម្ងាយ១០០ម៉ែត្រ, ហែលបណ្តាក់សេរី 4x200m និងហែលចម្រុះបណ្តាក់ Mixed 4x100m Medley Relay។
ការរកបានមេដាយ៧ក្នុងព្រឹត្តិការណ៍អូឡាំពិកតែមួយនេះ នាំឲ្យ McKeon តាមស្មើកំណត់ត្រាកីឡាការិនីកាយសម្ព័ន្ធសូវៀត Maria Gorokhovskaya កាលពីឆ្នាំ១៩៥២។
កាលពីព្រឹត្តិការណ៍អូឡាំពិកឆ្នាំ២០១៦នៅ Rio de Janeiro កីឡាការិនីរូបនេះ ក៏បានឈ្នះមេដាយមាស១ មេដាយប្រាក់២ និងសំរឹទ្ធ១ផងដែរ៕
© រក្សាសិទ្ធិដោយ thmeythmey.com