ករណីឆ្លងជំងឺកូវីដ-១៩ នៅចិន ចាប់ផ្ដើមកម្រើកឡើងវិញគួរឱ្យបារម្ភ ដោយអាជ្ញាធរចិនអះអាងថា បណ្ដាលមកពីវីរុសបំប្លែងខ្លួនដែលតាដែលរកឃើញមុនគេនៅឥណ្ឌា។ ខេត្តក្រុងជាច្រើនរបស់ចិន បានរាយការណ៍ករណីឆ្លងថ្មី ដោយនៅថ្ងៃទី១ ខែសីហា ចិនមានរកឃើញករណីឆ្លងសរុប៥៣ករណី។​

 

ប្រភពចម្លងមួយទៀត ក៏ផ្ទុះនៅខេត្តហឺណាន ទីដែលទឹកជំនន់សម្លាប់មនុស្សជិត១០០នាក់នាពេលកន្លងមក។ បើតាមទីភ្នាក់ងារព័ត៌មានរដ្ឋចិន Xinhua គណៈកម្មការសុខាភិបាលខេត្តហឺណាន រកឃើញករណីឆ្លងថ្មី១២នាក់ និងករណីគ្មានរោគសញ្ញា២០នាក់ ដែលសុទ្ធសឹងនៅទីក្រុងចឹងចូវទាំងអស់។ ប្រភពចម្លងនៅខេត្តនេះ គឺអ្នកសម្អាតមន្ទីរពេទ្យពីរនាក់ដែលប្រើប្រាស់ដើម្បីព្យាបាលអ្នកដំណើរមកក្រៅប្រទេស។ ករណីសរុបដែលទាក់ទង កើនដល់២៧នាក់ហើយ។

 

អាជ្ញាធរក្រុងចឹងចូវ ក៏ធ្វើតេស្តប្រជាជនក្នុងក្រុងទាំង១០លាននាក់ ដើម្បីទប់ស្កាត់ការរាលដាល។ ប្រធានគណៈកម្មការសុខាភិបាលក្រុង ក៏ត្រូវបញ្ចប់តំណែងផងដែរ។

 

ចំណែកករណីឆ្លងទាក់ទងករណីវិជ្ជមាននៅព្រលានយន្តហោះណានជីង ខេត្តជាំងស៊ូ រាលដាលដល់ខេត្ត និងក្រុងជាង២០ហើយ បន្ទាប់ពីកោះហៃណាន តំបន់ស្វយ័តនីងស្យា និងខេត្តសានតុង រកឃើញករណីឆ្លងដែលពាក់ព័ន្ធនេះ។ អាជ្ញាធរក្រុងណានជីង បានធ្វើតេស្តប្រជាជនទាំងជាង៩លាននាក់ដល់ទៅ៣ដងដើម្បីរកករណីឆ្លងទាំងអស់៕