បច្ចុប្បន្ន កម្ពុជាបានផ្អាកដំណើរការបូមប្រេងឆៅទាំងស្រុង បន្ទាប់ពីក្រុមហ៊ុន KrisEnergy ដែលមានមូលដ្ឋាននៅប្រទេសសិង្ហបុរី ប្រកាសក្ស័យធន នាដើមខែមិថុនា ឆ្នាំ២០២១មក។ ក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដល់កុមារនិងយុវជនដែលមានអាយុពី១២ដល់១៧ឆ្នាំ កាលពីថ្ងៃទី១សីហា  សម្តេច ហ៊ុន សែន បាន​ប្រកាសនូវភាពបរាជ័យនៃដំណើរការបូមប្រេងជាលើកដំបូងនៅកម្ពុជា ដោយក្រុមហ៊ុន KrisEnergy។ 

 

«​២៩​ធ្នូ[ឆ្នាំ២០២០] ដែលយើងប្រកាសដំណក់ប្រេងលើកដំបូង ប្រហែលបរាជ័យហើយ»។ នេះជាការបញ្ជាក់របស់សម្តេច ហ៊ុន សែន ដែលបានបន្តរៀបរាប់ដូច្នេះ៖«[យើង]​គ្រោងថា ក្នុងមួយថ្ងៃបូមប្រេងបាន៥,៧០០បារ៉ែល [តែ]ទីចុង​បំផុត​មួយថ្ងៃ​បាន​តែ​១,០០០បារ៉ែល។ ឥឡូវ​ក្រុមហ៊ុន​ហ្នឹង​ក្ស័យធន ហើយវាបូក​ថែមទាំង​អាកប៉ាល់​ដែល​យើង​បូម[ប្រេង]​ដាក់ហ្នឹង ​វារត់ចេញ​ទៅ​បាត់ទៅ ដោយយើង​ទប់​​មិនទាន់ វា​ចូល​ដល់​ដី​ថៃ ​រួចហើយ​គេមាន​មេធាវី​របស់​គេ[…]។  ឥឡូវ ​វា​យក​ទាំង​​ប្រេង​ទៅ​បាត់​អស់​រលីង! បាត់អស់​អាប្រេង​ហ្នឹង»។ 

 

 

បើតាមលោក ជៀប សួរ អគ្គនាយកប្រេងកាតនៃក្រសួងរ៉ែ និងថាមពល មុនពេលក្រុមហ៊ុន KrisEnergy ប្រកាសក្ស័យធន ក្រុមហ៊ុននេះ បូមប្រេងពីប្លុកAបានចំនួន២៩ម៉ឺនបារ៉ែល ដោយយករក្សាទុកនៅក្នុងកប៉ាល់ ដែលសព្វថ្ងៃកំពុងស្ថិតនៅប្រទេសថៃ។ លោក និយាយប្រាប់សារព័ត៌មានThmeyThmey តាមទូរសព្ទនាល្ងាចថ្ងៃទី២សីហា ដូច្នេះ៖«កប៉ាល់ដែលលួចដឹកប្រេងកម្ពុជារត់ទៅបាត់ហ្នឹង គឺក្រុមហ៊ុន KrisEnergy បានជួលពីគេមក សម្រាប់ដំណើរការនៃអាជីវកម្មបូមប្រេងនៅកម្ពុជា។ ក្រោយយើងដាក់សំណើរទាមទារប្រេងនោះមកវិញ ម្ចាស់កប៉ាល់នោះ បានប្រាប់យើងថា ក្រុមហ៊ុន KrisEnergy បានជំពាក់លុយគាត់»។

 

 

មកទល់ពេលនេះ ក្រសួងរ៉ែ និងថាមពល កំពុងបន្តនិតីវិធីដោះស្រាយផ្នែកច្បាប់ ជាមួយក្រុមហ៊ុន KrisEnergy ខណៈក្រុមហ៊ុននេះក៏​កំពុង​ដំណើរ​ការរឿង​ក្ដី​នៅ​តុលាការ​ ក្រោយ​ប្រកាស​ក្ស័យធន​ដោយសារ​បំណុល។ បើតាមលោក ជៀប សួរ ក្នុងដំណាក់កាល ដែលក្រសួងកំពុងដោះស្រាយជាមួយក្រុមហ៊ុន KrisEnergy នេះ គឺមិនទាន់មានក្រុមហ៊ុនថ្មីណា សម្លឹងឃើញការវិនិយោគលើការបូមប្រេងនៅកម្ពុជាឡើយ​ ខណៈកម្ពុជានៅមានប្លុកប្រេង​ជាច្រើនទៀត (ទាំងនៅដែនទឹកនិងដែនគោក កម្ពុជាមានប្រេងប្រមាណ២០ប្លុក) ​ដែលត្រូវបន្តការរុករក​នឹង​ធ្វើ​អាជីវកម្ម៕