ព័ត៌មានលើទំព័រហ្វេសប៊ុករបស់សម្តេច ស ខេង បានឲ្យដឹងថា តាមរយៈកិច្ចប្រជុំនោះ កម្ពុជា-វៀតណាម ក៏បានបន្តសហការគ្នាទប់ស្កាត់ការឆ្លងដែនខុសច្បាប់ដែរ រួមទាំងបន្តសហការគ្នារក្សាសន្តិសុខ សណ្ដាប់ធ្នាប់ និងសុវត្ថិភាពតាមតំបន់ព្រំដែន ដើម្បីកសាងព្រំដែន ដែលមានសន្តិភាព និងការអភិវឌ្ឍ។

 

សម្តេច ស ខេង និង លោក តូ ឡាំ បានវាយតម្លៃខ្ពស់ចំពោះកិច្ចសហប្រតិបត្តិការកន្លងមក ដែលរក្សាបានសន្តិសុខ សណ្តាប់ធ្នាប់ និង សុវត្ថិភាពសង្គម  ទោះបីស្ថិតក្នុងស្ថានភាពប្រឈមនឹងជំងឺកូវីដ-១៩ក្តី។ លើសពីនេះ រដ្ឋមន្រ្តីនៃប្រទេសទាំងពីរ បង្ហាញការមើលឃើញដូចគ្នានូវសមិទ្ធផលសំខាន់ៗនៃកិច្ចសហប្រតិបត្តិការរយៈពេល១ឆ្នាំចុងក្រោយនេះ ដូចជា ការជួយគាំទ្រគ្នាទៅវិញទៅមកក្នុងការប្រយុទ្ធប្រឆាំងនឹងជំងឺកូវីដ-១៩ ការកសាងសមត្ថភាពកងកម្លាំង និងការទប់ស្កាត់បទល្មើសឆ្លងដែនគ្រប់ប្រភេទ ជាពិសេស បទល្មើសគ្រឿងញៀន និងអំពើជួញដូរមនុស្សឆ្លងដែន ជាដើម៕