ជាតិ
សេដ្ឋកិច្ច
លោកស្រី ម៉ារីយ៉ាម សាលីម ជាប្រធានគ្រប់គ្រងធនាគារពិភពលោកថ្មី ប្រចាំកម្ពុជា លោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកថ្មីប្រចាំកម្ពុជា។ រូបថត លោកស្រី ម៉ារីយ៉ាម សាលីម ជាប្រធានគ្រប់គ្រងថ្មីប្រចាំកម្ពុជា។ រូបថត Twitter Maryam Salim
× ភ្នំពេញ៖ លោកស្រី ម៉ារីយ៉ាម សាលីម ត្រូវបានធនាគារពិភពលោក(World Bank) តែងតាំង ជាអ្នកគ្រប់គ្រងថ្មី របស់ធនាគារពិភពលោកប្រចាំប្រទេសកម្ពុជា ជំនួសឱ្យលោកស្រី អ៊ីងហ្គូណា ដូប្រា ថា ដែលបានបំពេញបេសកម្មអស់រយៈពេល៥ឆ្នាំ នៅរាជធានីភ្នំពេញ។ នេះបើយោងតាមសេចក្តីប្រកាសព័ត៌មានរបស់ធនាគារពិភពលោក។
ធនាគារពិភពលោក បានប្រកាសតែងតាំងលោកស្រី ម៉ារីយ៉ាម សាលីម ជាប្រធានគ្រប់គ្រងថ្មីប្រចាំកម្ពុជា កាលពីថ្ងៃទី៩សីហា ឆ្នាំ២០២១ ដោយត្រូវបន្តភារកិច្ចទាំងស្រុងពីលោកស្រី អ៊ីងហ្គូណា ដូប្រាថា ដែលផ្លាស់ទៅចាត់តាំងថ្មីនៅប្រទេសម៉ុលដូវ៉ា។
លោកស្រី ម៉ារីយ៉ាម សាលីម ដែលជាប្រធានគ្រប់គ្រងថ្មីរបស់ធនាគារពិភពលោកប្រចាំកម្ពុជា បានថ្លែងក្នុងសេចក្តីប្រកាសខ្លួនថា លោកស្រី នឹងទទួលខុសត្រូវលើកិច្ចការរបស់ធនាគារពិភពលោកជាមួយរដ្ឋាភិបាល បូករួមនឹងកញ្ចប់គម្រោងនានា គិតជាទឹកប្រាក់សរុប១,១ពាន់លានដុល្លារ ដែលភ្នាក់ងាររដ្ឋាភិបាលកំពុងអនុវត្ត តាមរយៈជំនួយហិរញ្ញវត្ថុ និងបច្ចេកទេសពីធនាគារពិភពលោក។ លោកស្រី បានបញ្ជាក់ថា គម្រោងទាំងនោះត្រូវបានរៀបចំតម្រូវ តាមអាទិភាពអភិវឌ្ឍរបស់កម្ពុជាអមដោយគោលដៅពីរ របស់ធនាគារពិភពលោក គឺដើម្បីកាត់បន្ថយភាពក្រីក្រ និងបង្កើនវិបុលភាពរួមសម្រាប់ប្រជាជនកម្ពុជា។
លើសពីនេះ លោកស្រី ម៉ារីយ៉ាម សាលីម ក៏បានត្រៀមលក្ខណៈក្នុងការស្តារសេដ្ឋកិច្ចកម្ពុជាពីវិបត្តិកូវីដ-១៩ ផងដែរ។ ប្រធានគ្រប់គ្រងថ្មីរបស់ធនាគារពិភពលោកប្រចាំកម្ពុជារូបនេះ បាននិយាយដូច្នេះ៖ «ខ្ញុំត្រៀមខ្លួនជាស្រេច នឹងធ្វើការជាមួយសហសេវិកកម្ពុជារបស់ខ្ញុំ ដើម្បីជួយប្រទេសកម្ពុជាគ្រប់គ្រងផលប៉ះពាល់នៃការរាតត្បាតជំងឺកូវីដ-១៩, រៀបចំមូលដ្ឋានសម្រាប់ការស្តារសេដ្ឋកិច្ចឱ្យរើបឡើងវិញយ៉ាងស្វាហាប់ និងកសាងភាពធន់សម្រាប់ទប់ទល់ជាមួយហេតុការណ៍អង្រួនកន្ត្រាក់សេដ្ឋកិច្ចនៅថ្ងៃខាងមុខ»។
ការបន្តអនុវត្តកញ្ចប់ឥណទានជាង១ពាន់ដុល្លាររបស់ធនាគារពិភពលោក ក្រោមវត្តមានរបស់ប្រធានគ្រប់គ្រងថ្មីនៅពេលនេះ គឺស្របតាមក្របខណ្ឌភាពជាដៃគូរបស់ធនាគារពិភពលោកសម្រាប់កម្ពុជា ក្នុងដំណាក់កាលឆ្នាំ ២០១៩–២០២៣ ដែលផ្តោតសំខាន់ទៅលើការបង្កើនភាពប្រសិទ្ធភាពរបស់វិស័យសាធារណៈ និងលើកកម្ពស់ការអភិវឌ្ឍវិស័យឯកជន, ការវិនិយោគលើធនធានមនុស្សតាមរយៈការពង្រីកលទ្ធភាពទទួលបានសេវាអប់រំ និងសេវាសុខាភិបាលមានគុណភាពសម្រាប់ក្មេងតូច, ការធ្វើពិពិធកម្ម និងបង្កើនផលិតភាពក្នុងវិស័យកសិកម្ម, ការលើកកម្ពស់ការប្រើប្រាស់ធនធានធម្មជាតិប្រកបដោយចីរភាព និងលើការពង្រឹងអភិបាលកិច្ច ស្ថាប័ន និងការចូលរួមរបស់ពលរដ្ឋ។ គម្រោងទាំងនេះជាយន្តការអាទិភាពសម្រាប់អភិវឌ្ឍន៍របស់កម្ពុជា ក្រោមគោលបំណងកាត់បន្ថយអត្រាក្រីក្រ និងបង្កើនភាពរីកច្រើនដល់ផ្នែកការរស់នៅរបស់ប្រជាជនកម្ពុជា។
លោកស្រី សាលីម មានបទពិសោធន៍ការងារជាង២០ឆ្នាំ ក្នុងធនាគារពិភពលោក ក្នុងនោះកាលពីពេលថ្មីនេះលោកស្រីធ្លាប់កាន់តំណែងជាប្រធានគ្រប់គ្រងប្រចាំប្រទេសអាល់បានី ផងដែរ។ កាលនៅកម្ពុជាពេលមុន លោកស្រីជាអ្នកឯកទេសផ្នែកអភិវឌ្ឍសង្គម និងធនធានមនុស្ស មុននឹងលោកស្រីបន្តទៅបំពេញមុខងារក្នុងតំណែងជាន់ខ្ពស់ផ្សេងៗនៅក្នុងផ្នែករៀបចំគោលនយោបាយប្រតិបត្តិការរបស់ធនាគារពិភពលោក នៅស្នាក់ការកណ្តាលក្នុងរដ្ឋធានីវ៉ាស៊ីនតោន សហរដ្ឋអាមេរិក។ លោកស្រីមានដើមកំណើតនៅប្រទេសតង់ហ្សានី មានសញ្ញាបត្រអនុបណ្ឌិតផ្នែកសេដ្ឋកិច្ចនិងទំនាក់ទំនងអន្តរជាតិពីសកលវិទ្យាល័យ Johns Hopkins, និងជាបណ្ឌិតច្បាប់ចេញពីសកលវិទ្យាល័យ Georgetown។ នេះបើតាមសេចក្តីប្រកាសព័ត៌មានរបស់ធនាគារពិភពលោក៕
© រក្សាសិទ្ធិដោយ thmeythmey.com