ការផ្លាស់ប្តូរដ៏គួរឱ្យភ្ញាក់ផ្អើលរបស់ Messi ទៅកាន់ក្លិបយក្សបរាំង PSG ត្រូវបានបញ្ចប់ដោយជោគជ័យ និងជាកីឡាករទី៤ របស់ក្រុមលោក Mouricio Pochettino បន្ទាប់ពីខ្សែបម្រើ Georginio Wijnaldum ខ្សែការពារ Sergio Ramos និងអ្នកចាំទី Giangluigi Donnarumma។​ ចាកចេញពី Barcelona ប៉ុន្តែខ្សែបម្រើសញ្ជាតិអាហ្សង់ទីនរូបនេះ នៅតែជាកីឡាករដែលមានប្រាក់ឈ្នួលខ្ពស់បំផុតលើលោកក្នុងពិភពបាល់ទាត់។
 

​យោងតាមរបាយការណ៍ផ្សេងៗ PSG បានផ្តល់ប្រាក់ពលកម្មដល់ Messi ប្រមាណ ៤១លានដុល្លារក្នុងមួយរដូវកាល បន្ទាប់ពីបង់ពន្ធ។ កិច្ចព្រមព្រៀងនេះមានរយៈពេលពីរឆ្នាំ និងជម្រើសសម្រាប់ឆ្នាំទី៣ថែមទៀត។ លើសពីនេះទៅទៀត បើតាមការផ្សាយរបស់កាសែត Marca ប្រាក់២៤លានដុល្លារត្រូវបាន PSG ប្រគល់ជូន Messi ដែលយល់ព្រមចុះហត្ថលេខាលេងឱ្យក្រុមខ្លួននេះ។
 

ប្រាក់ឈ្នួលដ៏ច្រើននេះ មានន័យថាខ្សែបម្រើវ័យ៣៤ឆ្នាំ នឹងទទួលបានក្នុងមួយខែ ៣,៥២លានដុល្លារ ឬ ៨៥ម៉ឺនដុល្លារក្នុងមួយសប្តាហ៍។ ជាង១២ម៉ឺនដុល្លារក្នុងមួយថ្ងៃដែល Messi ទទួលបានពី PSG ឬមួយម៉ោងស្មើជាង១ម៉ឺនដុល្លារ ឬ ១៥០ដុល្លារក្នុងមួយនាទី និងជិត៣ដុល្លារក្នុងមួយវិនាទី។
 

៤១លានដុល្លារក្នុងមួយឆ្នាំ ជាប្រាក់ឈ្នួលដែល Messi ទទួលបានខ្ពស់ជាងគេលើលោក ដោយលើស Neymar ដែលរកបាន៣៦លានដុល្លារមួយឆ្នាំ។
 

ជារឿងគួរឱ្យចាប់អារម្មណ៍បំផុតនោះ បើទោះត្រូវចំណាយប្រាក់ឈ្នួលបន្ថែម ក៏ប៉ុន្តែក្លិបដែលមានមហាសេដ្ឋីប្រេងសញ្ជាតិកាតានៅតែបន្តពិក្សាជាមួយ Kylian Mbappe ជុំវិញការបន្តកិច្ចសន្យាថ្មី ដោយនឹងផ្តល់ថ្លៃពលកម្មឱ្យខ្សែប្រយុទ្ធសញ្ជាតិបារាំងរូបនេះប្រហាក់ប្រហែល Neymar និង Messi ដែរ៕