ក្នុងរបាយការណ៍ដែលផ្សាយដោយទីភ្នាក់ងារព័ត៌មានរដ្ឋចិន Xinhua អំឡុងពេលជំនួបលើកដំបូង លោក ឈីន កាង និងលោកស្រី វិនឌី ស៊ើមែន បានផ្លាស់ប្តូរទស្សនៈគ្នាយ៉ាងស៊ីជម្រៅលើបញ្ហាទ្វេភាគី។ ភាគីទាំងពីរ ក៏ឯកភាពគ្នាថា ទំនាក់ទំនងទ្វេភាគី មានសារសំខាន់ខ្លាំងណាស់ ហើយចាំបាច់ត្រូវ ដោះស្រាយបញ្ហាដែលកំពុងកើតមានតាមរយៈការសន្ទនា និងត្រូវស្ដារទំនាក់ទំនងឱ្យបានប្រសើរឡើង វិញដែរ។

 

ខណៈព័ត៌មានលម្អិតនៃជំនួបមិនត្រូវបានបញ្ចេញនោះ ទីភ្នាក់ងារព័ត៌មាន Xinhua រាយការណ៍ទៀតថា លោក ឈីន បានលើកយកបញ្ហាតៃវ៉ាន់ទៅជជែកជាមួយលោកស្រី ស៊ើមែន ។ អគ្គរដ្ឋទូតចិនទើបកាន់តំណែងរូបនេះ បានសង្កត់ធ្ងន់ថា រឿងកោះតៃវ៉ាន់ ជាបញ្ហាសំខាន់ និងរសើបបំផុតនៅក្នុង ទំនាក់ទំនងចិន-អាមេរិក។ ចំពោះមុខលោកស្រី ស៊ើមែន លោក ឈីន បញ្ជាក់ជំហរយ៉ាងច្បាស់ថា ចិន នៅតែចាត់ទុកថាតៃវ៉ាន់ជាដែនអធិបតេយ្យរបស់ខ្លួន។

 

ចំណែកក្រសួងការបរទេសអាមេរិកវិញ លើកឡើងថា លោកស្រី ស៊ើមែន ក៏លើកឡើងពីបញ្ហាដែលលោកស្រីបានជជែកជាមួយមន្រ្តីចិននៅក្រុងធានជីនកាលពីខែកក្កដាកន្លងទៅ។ មន្រ្តីលំដាប់ទីពីរបស់ក្រសួងការបរទេសអាមេរិករូបនេះបន្តថា អាមេរិកនៅតែចង់បន្តការសន្ទនាពីប្រធានបទដដែលទៀត។ 

 

កាលពីជំនួបនៅធានជីនក្បែររដ្ឋធានីប៉េកាំង លោកស្រី ស៊ើមែន បានជួបជាមួយសមភាគី សៀ ហ្វឹង និងប្រមុខការទូតចិន វ៉ាង យី ។ កាលនោះ អ្នកការទូតចិនទាំងពីរ សុទ្ធតែប្រើពាក្យសម្ដីធ្ងន់ៗ និងបញ្ជាក់ច្បាស់ពីជំហររបស់អាមេរិកលើបញ្ហាហុងកុង ស៊ីនជាំង និងកោះតៃវ៉ាន់ផងដែរ។ 

 

គួរបញ្ជាក់ថា ចិនទំនងកំពុងតែខឹងអាមេរិកមិនទាន់បាត់បង់ ខណៈរដ្ឋបាលលោកប្រធានាធិបតី ចូ បៃឌិន បង្កើនការគាំទ្រចំពោះកោះតៃវ៉ាន់រួមទាំងការលក់អាវុធ និងការផ្តល់វ៉ាក់សាំងបង្ការជំងឺកូវីដ-១៩ ជាដើម៕