កីឡាករ​អត្តពលកម្ម Joshua Cheptegei ទទួលបានជោគជ័យ​ដ៏ធំធេងជាងគេនៅ Tokyo 2020 ដោយទទួលបាន​មេដាយ​មាស​លើ​វិញ្ញាសារត់ចម្ងាយ​៥០០ម៉ែត្រ និងមេដាយ​ប្រាក់​ក្នុងចម្ងាយ​១០ ០០០ម៉ែត្រ។ កីឡាការិនី Peruth Chemutai បាន​មេដាយ​មាស​លើវិញ្ញាសា Women’s 3000m Steeplechase ខណៈកីឡាករ Jacop Kiplimo បានមេដាយ​សំរឹទ្ធ​លើ​វិញ្ញាសា​រត់ចម្ងាយ​១០ ០០០ម៉ែត្រ។

 

«ខ្ញុំត្រូវផ្តល់​ការលើកទឹកចិត្តតបទៅវិញ​សម្រាប់ជ័យ​លាភីមេដាយអូឡាំពិក នូវ​រថយន្ត និង​ប្រាក់ឧបត្ថម្ភ»។ នេះជាការ​បញ្ជាក់​របស់​លោក Museveni ដែលក្រោយមក​លោក​បាន​ចេញសេចក្តីសម្រេចភ្លាមៗពីគោលការណ៍ផ្តល់ប្រាក់បៀវរត្សសម្រាប់ជ័យលាភីមេដាយកីឡាពីព្រឹត្តិការណ៍អូឡាំពិក និងកម្រិតទ្វីប។

 

តាម​សេចក្តីសម្រេចដែល​ដក​ស្រង់ដោយ African News ម្ចាស់មេដាយមាស​នឹងទទួលបាន​ប្រាក់​បៀវត្ស១៤១៥ដុល្លារអាមេរិក មេដាយ​ប្រាក់បាន​៨៤៥​ដុល្លារអាមេរិក និងមេដាយសំរឹទ្ធ ទទួលបាន​២៨០​ដុល្លារអាមេរិក ដែលនេះជាចំនួន​ដ៏ច្រើន​សម្រាប់អ៊ូហ្កង់ដា ក្នុងនាម​ប្រទេសក្រីក្រមួយនៅលើពិភពលោក។

 

ក្រៅពី​ប្រាក់រង្វាន់ទៅ​តាមគោល​ការណ៍រដ្ឋាភិបាល ម្ចាស់មេដាយមាស Cheptegei និង Chemutai ទទួលបាន​រថយន្ត​ថ្មីទំនើប Mitsubishi Outlanders ម្នាក់មួយគ្រឿង ខណៈ Kiplimo បាន​រថយន្ត Mitsubishi L200។

 

ក្រៅពីនេះ លោក​ប្រធានាធិបតី Museveni ក៏បាន​សន្យា​​សាងសង់ផ្ទះថ្មីសម្រាប់ឪពុកម្តាយ​របស់ជ័យលាភីមេដាយមាសអូឡាំពិកទាំងពីររូបផងដែរ។

 

ប្រធានាធិបតីរូបនេះ បានអះអាងថា លោកគោរពតាមសំដី​របស់ខ្លួនដែលបាន​សន្យា​តាំងពីឆ្នាំ​២០១៣ មក។ «ពេលនេះ ខ្ញុំជាមនុស្ស​ដ៏រីករាយ​ម្នាក់ ដោយសារ​ការ​ឈ្នះមេដាយមកជូនជាតិនេះ ពួក​គេ​ត្រូវទទួលបាន​រថយន្តម្នាក់១គ្រឿងពី​ខ្ញុំ»។ លោក​បាន​រំលឹកឡើង​វិញយ៉ាងដូច្នេះ ដោយ​ច្រានចោលពាក្យរិះគន់ថា អត្តពលិក​នៃប្រទេសអាហ្វ្រិកមួយនេះ ឈ្នះមេដាយ​ដោយសារតែសំណាង៕