អតីតមេដឹកនាំសូវៀត៖ យុទ្ធនាការអាមេរិកនៅអាហ្វហ្កានីស្ថាន បានបរាជ័យតាំងពីដំបូងម្ល៉េះ

សង្គមអន្តរជាតិ

អន្តរជាតិ

អតីតមេដឹកនាំសូវៀត៖ យុទ្ធនាការអាមេរិកនៅអាហ្វហ្កានីស្ថាន បានបរាជ័យតាំងពីដំបូងម្ល៉េះ

17, Aug 2021 , 10:23 pm

រូបភាព

លោក Mikhail Gorbachev អតីតមេដឹកនាំសហភាពសូវៀត។ រូបភាព៖ Reuters

ដោយ: ធៀន ភារិន្ទ

លោកMikhail Gorbachev នៅថ្ងៃទី១៧ ខែសីហា បានលើកឡើងថា យុទ្ធនាការបោសសម្អាតក្រុមភេរវករនៅអាហ្វហ្កានីស្ថានរបស់អាមេរិក និងបក្សសម្ព័ន្ធយោធាណាតូ បានទទួលបរាជ័យ តាំងពីដើមដំបូងមកម្ល៉េះ។ លោក Mikhail Gorbachev គឺជាអតីតមេដឹកនាំសហភាពសូវៀត ដែលបានបញ្ជាឱ្យដកទ័ពសូវៀត ចេញពីអាហ្វហ្កានីស្ថាន កាលពីឆ្នាំ១៩៨៩។

ផែនការដកទ័ពអាមេរិក និងសម្ព័ន្ធមិត្តចេញពីអាហ្វហ្កានីស្ថាន បានក្លាយជាប្រធានបទដ៏ក្តៅ ដែលថ្នាក់ដឹកនាំប្រទេស ក្រុមអ្នកជំនាញ និងមនុស្សផ្សេង លើកយកពិភាក្សា។ បន្ទាប់ពីការដកទ័ពរបស់អាមេរិក ក្រុមតាលីបង់ ដែលបានបាត់បង់អំណាចកាលពី២០ឆ្នាំមុន បានកាន់កាប់អាហ្វហ្កានីស្ថានជាថ្មី។ រដ្ឋាភិបាល ដែលដឹកនាំដោយកងជីវពលមួយនេះ អាចនឹងបង្កើតឡើងក្នុងពេលឆាប់ៗខាងមុខ។

ទាក់ទិននឹងការដកទ័ពរបស់អាមេរិកនៅអាហ្វហ្កានីស្ថាននេះ អតីតមេដឹកនាំសហភាពសូវៀត បានហៅបេសកកម្មរបស់អាមេរិក បានបរាជ័យតាំងពីដើមដំបូងមកម្ល៉េះ។ «ពួកគេ [អាមេរិក និងណាតូ] គួរតែសារភាពថាពីភាពបរាជ័យនៅដើមដំបូង»។ លោក Gorbachev បានសង្កត់ធ្ងន់បែបនេះទៅកាន់ទីភ្នាក់ងារព័ត៌មានរុស្ស៊ី RIA ដោយបន្ថែមថា រឿងដែលសំខាន់នៅពេលនេះ គឺជាមេរៀន ដែលគួរទាញយកពីបញ្ហាបានកើតឡើង និងធានាថាបញ្ហាដដែលនេះ មិនគួរកើតឡើងម្តងទៀតឡើយ។

ក្នុងន័យនេះ អតីតមេដឹកនាំសូវៀតរូបនេះ បានបន្តថា បើទោះរុស្ស៊ីបានគាំទ្រនៅដំណាក់កាលដំបូងមែន យុទ្ធនាការរបស់អាមេរិកនៅតែបរាជ័យ។ នៅក្នុងឆ្នាំ២០០១ ក្រុមប្រឹក្សាសន្តិសុខ បានសេចក្តីសម្រេចគាំទ្រអាមេរិក ក្នុងការធ្វើសង្គ្រាមនៅអាហ្វហ្កានីស្ថាន ដើម្បីលុបបំបាត់ក្រុមភេរវករ។ បរាជ័យរបស់អាមេរិកបែបនេះ ដោយសារតែការពន្លើសលើការគំរាមកំហែង និងការកំណត់គំនិតភូមិសាស្ត្រនយោបាយមិនបានល្អ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

ក្នុងថ្ងៃដដែលនេះ អតីតប្រធានាធិបតីអាមេរិក លោក George W Bush ដែលបានប្រកាសសង្គ្រាមប្រឆាំងភេរវកម្ម កាលពីឆ្នាំ២០០១ និងជាអ្នកបញ្ជូនទាហានទៅអាហ្វហ្កានីស្ថាន បានជំរុញឱ្យរដ្ឋាភិបាលអាមេរិកជួយជនភៀសខ្លួនអាហ្វហ្កានីស្ថាន បន្ទាប់ពីក្រុមតាលីបង់គ្រប់គ្រងប្រទេស។ អតីតមេដឹកនាំអាមេរិករូបនេះ ក៏បានបង្ហាញក្តីកង្វល់ពីព្រឹត្តិការណ៍នៅអាហ្វហ្កានីស្ថានផងដែរ៕