លោក Nicholas Burns ត្រូវបានរដ្ឋបាលប្រធានាធិបតី ចូ បៃឌិន ចុចឈ្មោះជាបេក្ខជនអគ្គរដ្ឋទូតអាម៉េរិកប្រចាំរដ្ឋធានីប៉េកាំង ដែលតំណែងនេះនៅទំនេរតាំងពីខែតុលា ឆ្នាំ២០២០ ក្រោយលោក Terry Brandstad លាលែងពីតំណែង។ លោក Burns ដែលជាមន្រ្តីផ្នែកការទូតយូរឆ្នាំ ជាអនុរដ្ឋមន្រ្តីការបរទេសពីឆ្នាំ២០០៥ ដល់ឆ្នាំ២០០៨ ផងដែរ។

 

បេក្ខភាពរបស់លោក Burns ត្រូវឆ្លងកាត់ការយល់ព្រមពីព្រឹទ្ធសភាសិន។ ប្រសិនបើទទួលបានការអនុម័ត អ្នកការទូតរូបនេះ នឹងត្រូវមានការងារធ្ងន់ដែលត្រូវដោះស្រាយ ខណៈទំនាក់ទំនងរវាងមហាអំណាចលេ១ និងលេខ២ របស់ពិភពលោក កំពុងធ្លាក់ចុះខ្លាំង។ បញ្ហាពាណិជ្ជកម្ម, បច្ចេកវិទ្យា, ជំងឺកូវីដ-១៩, តៃវ៉ាន់ និងសមុទ្រចិនខាងត្បូង កំពុងរង់ចាំលោក Burns សម្របសម្រួល។​ បញ្ហានៅអាហ្វហ្កានីស្ថាន ក៏ជាបញ្ហាដែរ។

 

យ៉ាងណាមិញ លោក Burns មិនមែនជាអ្នកជំនាញកិច្ចការចិន ដូចគ្នានឹងអគ្គរដ្ឋទូតមុនៗដែរ។ លោក ជាមនុស្សជំនិតម្នាក់របស់លោក បៃឌិន ដោយធ្លាប់ជាទីប្រឹក្សាយុទ្ធនាការបោះឆ្នោត ហើយក៏ធ្លាប់ធ្វើការជាមួយមនុស្សស្និទ្ធលោក បៃឌិន មួយចំនួនរាប់ទាំងរដ្ឋមន្ត្រីការបរទេសបច្ចុប្បន្ន អាន់តូនី ប្លីងខិន ។ លោក ចច ដាប់ប៊លយូ ប៊ូស តែងតាំងលោក Burns ជាអនុរដ្ឋមន្ត្រីការបរទេសទទួលបន្ទុកកិច្ចការនយោបាយដែលជាតំណែងលំដាប់ទី៣ នៅក្រសួងការបរទេស។

 

ក្នុងតំណែងតំណាងអាម៉េរិកលើឆាកអន្តរជាតិ លោក Burns ក៏ធ្លាប់ជាអគ្គរដ្ឋទូតអាម៉េរិកប្រចាំណាតូ និងក្រិក។ 

 

ចិន ក៏ទើបតែងតាំងអគ្គរដ្ឋទូតប្រចាំវ៉ាស៊ីនតោនវិញដែរ។ អគ្គរដ្ឋទូតថ្មីឈ្មោះ ឈីន កាង ក៏មិនមែនជាមនុស្សជំនាញខាងកិច្ចការអាម៉េរិកដែរ តែជាមនុស្សជំនិតរបស់ប្រធានាធិបតី ស៊ី ជិនភីង ។ លោក ឈីន នេះ ជាធ្លាប់ជាអនុរដ្ឋមន្រ្តីការបរទេសចិន និងកាន់ការងារពិធីការរបស់លោក ស៊ី ជាច្រើនឆ្នាំ៕