វ៉ាក់សាំងបង្ការជំងឺកូវីដ-១៩ របស់ក្រុមហ៊ុនModerna មានប្រសិទ្ធភាពយ៉ាងហោចណាស់ ៦ខែ ឬលើសពីនេះ និងអាចប្រឆាំងវីរុសបង្កជាជំងឺកូវីដ-១៩ បំប្លែងខ្លួនថ្មីជាច្រើនទម្រង់ ពិសេសប្រឆាំងនឹងវីរុសទម្រង់ ដែលតា។ នេះបើតាមការសិក្សាថ្មីមួយចុះផ្សាយលើទំព័រសុខភាពនៃទូរទស្សន៍ CNN នៅថ្ងៃទី១៣ ខែសីហា។
ក្រុមអ្នកស្រាវជ្រាវ ដឹកនាំដោយវិទ្យាស្ថានសុខភាពជាតិអាមេរិក បានរកឃើញថា វ៉ាក់សាំងបង្ការជំងឺកូវីដ-១៩ របស់ ក្រុមហ៊ុន Moderna មានសមត្ថភាពការពារវីរុសជាបង្កជំងឺកូវីដ-១៩ គ្រប់ទម្រង់ បានរយៈពេល ៦ខែ ឬទំនងជាលើសពីរយៈពេលនេះ។
អ្វីដែលពិសេស វ៉ាក់សាំងក្រុមហ៊ុនមួយនេះ ងាយបង្កើតប្រព័ន្ធភាពស៊ាំប្រឆាំងវីរុសទម្រង់ ដែលតា ដែលកំពុងរីករាលដាលខ្លាំងនៅទូទាំងពិភពលោក។ ក្រុមអ្នកជំនាញ នឹងបន្តស្វែងរកភស្តុតាងបន្ថែម ដើម្បីបញ្ជាក់ពីរយៈពេលនៃប្រសិទ្ធភាពវ៉ាក់សាំងផងដែរ ថាតើវាអាចប្រឆាំងនឹងជំងឺកូវីដ-១៩ បានយូរជាង ៦ខែ ឬយ៉ាងណា។
វីរុសបង្កជាជំងឺកូវីដ-១៩ គ្រប់ទម្រង់នេះ សំដៅទៅលើវីរុសបំប្លែងថ្មីដែលបានបញ្ចូលក្នុងការសិក្សាមានដូចជា វីរុសទម្រង់ថ្មី B.1.1.7 (អាល់ហ្វា), B.1.351 (បែតា), P.1 (ហ្កាម៉ា), B.1.429 (អិបស៊ីឡោន) B.1.526 (លោតា) និងវីរុសស្ថិតក្នុងក្តីបារម្ភខ្លាំង B.1.617.2 (ដែលតា)។
ក្រុមអ្នកស្រាវជ្រាវបានធ្វើតេស្តឈាមជាច្រើនដងពីអ្នកស្ម័គ្រចិត្ត ២៤នាក់ដែលបានចាក់វ៉ាក់សាំងពេញលេញ។ ការធ្វើតេស្តដំបូង ត្រូវបានពិនិត្យបន្ទាប់ពីចាក់វ៉ាក់សាំង Moderna ដូសទី១ ចំនួន ៤សប្តាហ៍ និង ធ្វើតេស្ត ៣ ដងទៀត បន្ទាប់ពីចាក់វ៉ាក់សាំងបានពេញលេញ ក្នុងរយៈពេល ៦ខែ។
«បន្ទាប់ពីបានចាក់វ៉ាក់សាំងដូសទី ២ ប្រព័ន្ធភាពស៊ាំរបស់បុគ្គលទាំងនោះ មានការឆ្លើយតបចំពោះវីរុសបំប្លែងខ្លួនថ្មីគ្រប់ទម្រង់ទាំងអស់»។ ក្រុមអ្នកស្រាវជ្រាវ បានសរសេរបែបនេះ នៅក្នុងរបាយការណ៍ខ្លួន។ អ្នកស្រាវជ្រាវទាំងនោះបន្តថា ពួកគេបានរកឃើញ ក្នុងរយៈពេលពីរសប្តាហ៍បន្ទាប់ពីការចាក់វ៉ាក់សាំង Moderna ដូសទី ២ គំរូឈាមទាំងអស់ មានសមត្ថភាពទប់ទល់នឹងវីរុសបង្កជាជំងឺកូវីដ-១៩ ក្នុងទម្រង់រៀបរាប់ខាងលើ។
ការសិក្សាដដែលនេះ បង្ហាញថា វីរុសបំប្លែងថ្មីទម្រង់ ដែលតា ឬ B.1.617.2 ដែលដែលត្រូវបានគេរកឃើញដំបូងនៅឥណ្ឌា ទំនងជាមានភាពងាយស្រួលក្នុងការបង្កើតប្រព័ន្ធភាពស៊ាំ ដើម្បីទប់ទល់ជាងបណ្តាវីរុសដទៃ។ លទ្ធផលបង្ហាញថា ៦ខែបន្ទាប់ពីចាក់វ៉ាក់សាំងដូសទី ២ គំរូសំណាកឈាមដល់ទៅ ៩៦ភាគរយមានអង្គបដិប្រាណប្រឆាំងនឹងវីរុសទម្រង់ ដែលតា នេះ។
តាមពិតទៅ ការសិក្សាខាងលើ ត្រូវបានធ្វើឡើង ដើម្បីទប់ស្កាត់ការរីករាលដាលនៃជំងឺកូវីដ-១៩ ដែលបណ្តាលមកពីវីរុសបំប្លែងថ្មី ពិសេសវីរុសទម្រង់ដែលតា ហើយវាក៏មានគោលដៅលើកទឹកចិត្តឱ្យប្រើប្រាស់វ៉ាក់សាំងក្រុមហ៊ុន Moderna តាមលទ្ធផលការសិក្សាដែរ។
សូមបញ្ជាក់ថា ការធ្វើតេស្តលើវ៉ាក់សាំងរបស់ Pfizer និង វ៉ាក់សាំង Johnson & Johnson ក៏ទទួលបានលទ្ធផលថា វាអាចមានប្រសិទ្ធភាពបង្ការជំងឺកូវីដ-១៩ បាន៦ខែ និងទំនងជាយូរជាងនេះដែរ៕