កាលពីពេលថ្មីៗកន្លងមកនេះ អ្នកស្រី Shorna-Kay M.Richards បានរៀបចំពិធីផ្លូវការមួយទទួលស្វាគមន៍បុគ្គលិកស្ម័គ្រចិត្តអូឡាំពិកដែលមានឈ្មោះពេញថា Tijana Kawashima Stojkovic ទៅស្ថានទូត ព្រមទាំងផ្ទល់វត្ថុអនុស្សាវរីយ៍មួយចំនួន ហើយថែមទាំងអញ្ជើញនាងទៅលេងហ្សាម៉ៃអ៊ីកផងដែរ។
Tijana បានក្លាយជាវីរនារីសម្រាប់ពលរដ្ឋ និងរដ្ឋាភិបាលក្រុង Kingston ដោយសារតែនាងក្លាយជាចំណែកនាំឲ្យ Parchment ឈ្នះមេដាយមាសអូឡាំពិក។ កាលពីថ្ងៃទី៥ ខែសីហា Parchment ត្រូវប្រកួតវគ្គផ្តាច់ព្រ័ត្រវិញ្ញាសារត់ឆ្លងឧបសគ្គចម្ងាយ១១០ម៉ែត្រ។ គេស្ទើរតែខកបង្ហាញវត្តមានក្នុងការប្រកួត ដោយបានឡើងជិះរថយន្តខុស និងមានផ្លូវផ្ទុយពីទីតាំងប្រកួត។
តាមរយៈវីដេអូមួយ Parchment បានបង្ហាញពីទង្វើដ៏ល្អរបស់ Tijana ដែលបានបង់ថ្លៃតាក់ស៊ីជំនួសខ្លួន ដែលធ្វើឲ្យគេទៅប្រកួតទាន់ពេលវេលា។ ក្រោយទទួលបានមេដាយមាស Parchment បានវិលទៅរក Tiana ដើម្បីអរគុណ និងបង្ហាញមេដាយនាង។ ក្រៅពីយកប្រាក់សងវិញ អត្តពលិករូបនេះ ក៏បានផ្តល់អាវយឺតជាអនុស្សាវរីយ៍ផងដែរ។
នៅឯហ្សាម៉ៃអ៊ីកឯណោះវិញ សារព័ត៌មាន The Japan News ផ្សាយឲ្យដឹងថា សណ្ឋាគារយ៉ាងហោចណាស់៥ប្រជែងគ្នា ត្រៀមស្វាគមន៍ Tijana នៅប្រទេសតំបន់ការ៉ាអ៊ីបមួយនេះ។ បន្ទប់ប្រធានាធិបតី នៅសណ្ឋាគារ Royalton Negril, បន្ទប់ថ្លៃបំផុតនៅ Half Moon, Iberostar និង Moon Palace Ocho Rios ជាដើម សុទ្ធតែជម្រើសដែល Tijana ជ្រើសបានគ្រប់ពេលនាអំឡុងវត្តមាននៅហ្សាម៉ៃអ៊ីក។
រដ្ឋមន្ត្រីក្រសួងទេសចរណ៍ហ្សាម៉ៃអ៊ីក ដែលបានផ្ញើលិខិតអញ្ជើញផ្លូវការ បានអះអាងពីការរាប់រងរាល់ការចំណាយទាំងអស់សម្រាប់ Tijana ទាំងការស្នាក់នៅ ការស្វែងយល់តន្ត្រី ម្ហូបអាហារ និងរមណីយដ្ឋាននានា។ នាងត្រូវបានចាត់ទុកជា «អ្នកស្ម័គ្រចិត្តប្រចាំឆ្នាំ» របស់ហ្សាម៉ៃអ៊ីក។
Tijana អាយុ២៥ឆ្នាំ បង្ហាញពីក្តីរំភើបចំពោះការផ្តល់តម្លៃពីសំណាក់រដ្ឋាភិបាលហ្សាម៉ៃអ៊ីក ក្នុងនោះរួមទាំងលោកប្រធានាធិបតី Andrew Holness ដែលចង់ជួបនាងដោយផ្ទាល់។ «កាយវិការនេះ បានបង្ហាញពីផ្លូវដ៏វិជ្ជមាននៃទំនាក់ទំនងមិត្តភាព និងគុណតម្លៃនៃសាមគ្គីភាព»។ នាងបានលើកយ៉ាងដូច្នេះ ដោយអះអាងពីការទទួលយកការរៀបចំរបស់ហ្សាម៉ៃអ៊ីកសម្រាប់វិស្សមកាល៧ថ្ងៃរបស់នាងទៅកាន់ទីនោះ៕