ការិយាល័យនាយកចារកិច្ចជាតិរបស់អាម៉េរិក បានបញ្ចេញជាសាធារណៈរបាយការណ៍សង្ខេបលទ្ធផលនៃការស៊ើបអង្កេតរបស់ខ្លួនលើប្រភពជំងឺកូវីដ-១៩ ។ របាយការណ៍សង្ខេបដែលចេញផ្សាយនៅថ្ងៃទី២៧ ខែសីហា មិនមានព័ត៌មានសម្ងាត់ឡើយ ដោយព័ត៌មានសំខាន់ៗ និងរសើបៗត្រូវដាក់ជូនប្រធានាធិបតី ចូ បៃឌិន ដែលបញ្ជាឱ្យស៊ើបអង្កេតប៉ុណ្ណោះ។ លោក បៃឌិន ទទួលបានរបាយការណ៍សម្ងាត់រួចហើយកាលពីដើមសប្ដាហ៍នេះ។

 

មិនខុសពីរបាយការណ៍ដែលស៊ើបអង្កេតរួមគ្នាដោយអង្គការសហប្រជាជាតិ និងចិនឡើយ របាយការណ៍របស់ចារកិច្ចអាម៉េរិក ក៏មិនអាចកំណត់ប្រភពដើមជំងឺកូវីដ-១៩ បានដែរ។ ក្នុងរបាយការណ៍សង្ខេបរបស់ខ្លួន សហគមន៍ចារកិច្ចអាម៉េរិកបញ្ជាក់ថា លុះត្រាមានការចូលរួមរបស់ចិន ទើបដំណើរការស្វែងរកប្រភពពិតប្រាកដនៃជំងឺកូវីដ-១៩ ដែលសម្លាប់ជីវិតមនុស្សជាង៤,៦លាននាក់ អាចសម្រេចទៅបាន។

 

លោក បៃឌិន ក្នុងសេចក្ដីថ្លែងការណ៍ដោយឡែកមួយ ក៏ប្ដេជ្ញាចិត្តជំរុញឱ្យចិនផ្ដល់ចម្លើយចំពោះការសង្ស័យដែលមាន។ មេដឹកនាំអាមេរិកអះអាងថា ព័ត៌មានសំខាន់ៗពីប្រភពនៃជំងឺនេះមាននៅចិនឯណោះ ប៉ុន្តែតាំងពីដើមទីមក រដ្ឋាភិបាលចិនបានរារាំងអ្នកស៊ើបអង្កេតអន្តរជាតិ និងសមាជិកសហគមន៍សុខាភិបាលពិភពលោកពីការទទួលបានព័ត៌មានទាំងនោះ។

 

របាយការណ៍របស់អាម៉េរិកសន្និដ្ឋានចុងក្រោយថា​ អ្នកជំនាញមិនអាចផ្ដល់ការការពន្យល់ជាក់លាក់ណាមួយឡើយដោយគ្មានព័ត៌មានពីចិនដូចជាសំណាក និងទិន្នន័យពីករណីឆ្លងដំបូងៗ។ ជំងឺកូវីដ-១៩ ផ្ទុះឡើងដំបូងនៅទីក្រុងវូហាននៅចុងឆ្នាំ២០១៩ មុនបន្តរាលដាលទៅកាន់ប្រទេសនានាលើពិភពលោក។ សម្មតិកម្មវីរុសបង្កជំងឺនេះបែកធ្លាយចេញពីមន្ទីរពិសោធន៍វូហាន ជាចំណុចដែលបន្តក្ដៅគគុកដដែល។

 

អ្វីគួរកត់សម្គាល់នោះ សហគមន៍ចារកិច្ចអាម៉េរិកដែលមានស្ថាប័នចំណុះជាច្រើន ក៏ខ្វែងគំនិតគ្នាលើសម្មតិកម្មនេះដែរ។ អង្គភាពខ្លះជឿថា កូរ៉ូណាវីរុស លេចចេញពីប្រភពធម្មជាតិ ហើយចម្លងទៅកាន់សត្វណាមួយ។ ប៉ុន្តែរបាយការណ៍សង្ខេបខាងលើបញ្ជាក់ថា ចំណុចនេះមានភាគរយទាប។ ចំណែកអង្គភាពខ្លះដាក់ការសង្ស័យថា មនុស្សដំបូងដែលមានជំងឺនេះ អាចឆ្លងមកពីប្រភពដែលទាក់ទងឧប្ទវហេតុនៅមន្ទីរពិសោធន៍ដូចជាអំឡុងពេលធ្វើពិសោធន៍ ការចាប់កាន់សត្វ ឬសំណាកវីរុសជាដើម៕