ប្រជាជនសិង្ហបុរី ដែលចង់ទទួលការចាក់វ៉ាក់សាំងបង្ការជំងឺកូវីដ-១៩ របស់ក្រុមហ៊ុន Sinopharm អាចកក់សេវាកម្មនៅតាមមន្ទីរពេទ្យ និងគ្លីនិកសុខភាពឯកជនដែលទទួលបានការអនុញ្ញាតពីរដ្ឋ។ ការកក់កន្លែងចាក់វ៉ាក់សាំង ចាប់ផ្ដើមពីថ្ងៃទី២៨ ខែសីហា ហើយការចាក់ នឹងចាប់ផ្ដើមពីថ្ងៃទី៣០ ខែសីហា។

 

ចំពោះតម្លៃវិញ សារព័ត៌មាន The Strait Times រាយការណ៍ថា នៅទីតាំងខ្លះ ការចាក់ពីរដូសមានតម្លៃ៩៨ដុល្លាររាប់បញ្ចូលពន្ធ ហើយទីតាំងខ្លះមានតម្លៃ៩៩ដុល្លារ។ គម្លាតដូសទី១ និងទី២ មានរយៈពេល៣សប្ដាហ៍ទៅ៤សប្ដាហ៍ ហើយអាចចាក់ពីមនុស្សអាយុ១៨ឆ្នាំឡើង។ លទ្ធផលសាកល្បងកន្លងបង្ហាញថា វ៉ាក់សាំងSinopharm មានប្រសិទ្ធភាពមិនឱ្យឆ្លង៧៩ភាគរយ។

 

វ៉ាក់សាំងរបស់ Sinopharm ជាវ៉ាក់សាំងទី៤ ដែលត្រូវបានប្រើប្រាស់នៅសិង្ហបុរី។ ការនាំចូលវ៉ាក់សាំងនេះ ធ្វើឡើងក្រោមកម្មវិធីពិសេសដូចវ៉ាក់សាំង Sinovac ។ វ៉ាក់សាំងទាំងពីរ សុទ្ធតែមិនរាប់បញ្ចូលក្នុងកម្មវិធីចាក់វ៉ាក់សាំងជាតិរបស់សិង្ហបុរី ខុសពីវ៉ាក់សាំងរបស់ Comirnaty របស់ Pfizer-BioNTech និង Moderna ។ លើសពីនោះ ក្នុងករណីមានបញ្ហាក្រោយចាក់ អ្នកទទួលវ៉ាក់សាំង ក៏មិនអាចទទួលបានការគាំទ្រពីរដ្ឋដែរ។

 

វ៉ាក់សាំងទាំងពីររបស់ចិន និយមប្រើក្នុងចំណោមអ្នកដែលមិនទុកចិត្ត ឬអាចមានបញ្ហាពេលចាក់វ៉ាក់សាំងប្រើបច្ចេកវិទ្យានាំសារ mRNA ដូចជាវ៉ាក់សាំងរបស់ Pfizer-BioNTech និង Moderna ជាដើម។

 

គិតត្រឹមថ្ងៃទី២៦ ខែសីហា សិង្ហបុរីមានអ្នកចាក់វ៉ាក់សាំងពេញលេញ៧៩ភាគរយហើយក្នុងចំណោមប្រជាជនសរុប៕