កងទ័ពអាកាសអាម៉េរិក បានបញ្ជូនដ្រូនទៅកម្ទេចរថយន្តមួយគ្រឿងក្នុងទីក្រុងកាប៊ុល ដោយសម្លាប់ជនសង្ស័យម្នាក់ដែលប្រុងវាយប្រហារអាកាសយានដ្ឋាន Hamid Karzai ។ ប្រតិបត្តិការនេះ ទំនងជាបានបំបែកផែនការរបស់ក្រុមភេរវកម្មដែលដាក់គោលដៅអាកាសយានដ្ឋានដូចកាលពីថ្ងៃទី២៦ ខែសីហា ដែលសម្លាប់ទាហានអាម៉េរិក១៣នាក់ និងប្រជាជនអាហ្វហ្កានីស្ថានរាប់រយនាក់។
 

ចំពោះការវាយប្រហារនៅថ្ងៃទី២៩ មន្ត្រីអាម៉េរិកម្នាក់និយាយថា ក្រោយការវាយប្រហារដោយដ្រូន ក៏ មានការផ្ទុះមួយដែលអាចបបញ្ជាក់ថា ឡាននោះបានកំពុងដឹកគ្រឿងផ្ទុះ។ ទីភ្នាក់ងារព័ត៌មាន Reuters បានស្រង់សាក្សីម្នាក់ថា ការផ្ទុះដ៏ធំមួយបានអង្រួនតំបន់នៅភាគខាងជើងនៃអាកាសយានដ្ឋាន Hamid Karzai ហើយទូរទស្សន៍ក្នុងស្រុកបានចាក់ផ្សាយវីដេអូពីផ្សែងខ្មៅហុយឡើងលើមេឃទៀតផង។
 

«យើងដឹងថា មានការផ្ទុះជាបន្តបន្ទាប់យ៉ាងខ្លាំងបន្ទាប់ពីការវាយប្រហារទៅលើរថយន្តខាងលើដែល នេះបង្ហាញថារថយន្តមានផ្ទុកសារធាតុផ្ទុះមួយចំនួនធំដែលអាចបណ្តាលឱ្យមាន មនុស្សស្លាប់ និងរង របួស»។​ ទីបញ្ជាការតំបន់កណ្តាលអាម៉េរិកលើបានអះអាងបែបនេះមុន បន្ថែមថា ​មិនទាន់មាន របាយការណ៍ច្បាស់លាស់ទេថា មានអ្វីកើតឡើង និងប៉ះពាល់នរណាខ្លះ ហើយពួកគេកំពុងស៊ើប អង្កេតបន្ថែម។
 

គួររំលឹកថា នៅថ្ងៃទី២៨ ខែសីហាលោកបៃឌិនបានព្រមានថា​ ស្ថានភាពនៅទីក្រុងកាប៊ុលមាន គ្រោះថ្នាក់ខ្លាំងណាស់ ហើយអាម៉េរិកនឹងបើកការវាយប្រហារបន្ថែមទៀតនៅទីក្រុងនេះដើម្បីទប់ទល់ និងសងសឹកក្រុមជ្រុលនិយមរដ្ឋឥស្លាម ISIS-K ៕