លោក ហង់ជួន ណារ៉ុន បានណែនាំ​ឲ្យមន្ទីរអប់រំទាំងអស់ ត្រូវពិភាក្សាជាមួយគណៈអភិបាលរាជធានីខេត្ត ក្នុងការជ្រើសរើស និងវាយតម្លៃលើសាលាមេត្តយ្យសិក្សា សាលាបឋមសិក្សា អនុវិទ្យាល័យ និងវិទ្យាល័យ ដែលមានលទ្ធភាពបើកដំណើរការឡើងវិញ ដោយត្រូវបង្កើតគណៈកម្មការគ្រប់គ្រង និងគោរពតាមគោលការណ៍ប្រតិបត្តិស្តង់ដា(SOP)​។ ជាមួយគ្នានេះ លោក ហង់ជួន ណារ៉ុន បានប្រាប់ឲ្យគ្រឹះស្ថានសិក្សានីមួយៗ​ ត្រូវបែងចែកគ្រូបង្រៀនក្នុងថ្នាក់ផ្សេង និងគ្រូបង្រៀននៅតាមបណ្ដុំផ្សេង។ 

 

«សាលារៀននីមួយៗដែលស្ថិតក្នុងតំបន់គ្មានហានិភ័យឆ្លង ឬតំបន់ដែលមានហានិភ័យឆ្លងទាប ឬតំបន់ដែលមានកុមារ និងសិស្សានុសិស្សចាក់វ៉ាក់សាំងច្រើន បែងចែកវេន ឬបណ្តុំតាមចម្រុះថ្នាក់ ដែលរៀបចំនៅតាមផ្ទះ វត្តអារាម ឬកន្លែងសមស្របណាមួយ»។ នេះបើតាមរដ្ឋមន្ត្រីអប់រំ។

 

សម្រាប់ភូមិសាស្ត្រដែលមានហានិភ័យខ្ពស់ លោករដ្ឋមន្ត្រីក្រសួងអប់រំ ​បានណែនាំឲ្យសិស្សានុសិស្ស និងគ្រូបន្តរៀន និងបង្រៀនតាមប្រព័ន្ធអេឡិចត្រូនិក ឬតាមបណ្តុំតូចៗនៅតាមផ្ទះ។ លោករដ្ឋមន្ត្រីក្រសួងអប់រំ ក៏ស្នើឲ្យឪពុកម្តាយ ឬអាណាព្យាបាលបន្តលើកទឹកចិត្ត និងយកចិត្តទុកដាក់ក្នុងការបង្រៀនកូនផងដែរ។ 

 

ក្នុងដំណើរការបើកសាលារៀនឡើងវិញនេះ លោក ហង់ជួន ណារ៉ុន ពុំអនុញ្ញាតឲ្យអាជីវករលក់ដូរនំចំណី អាហារ និងសកម្មភាពហាត់កីឡានៅតាមសាលារៀនឡើយ។ លោករដ្ឋមន្ត្រីក្រសួងអប់រំ ក៏បានស្នើឲ្យគ្រូបង្រៀនដែលមានអាយុលើសពី៥០ឆ្នាំឡើងទៅ គួរបន្តបង្រៀនតាមអនឡាញ ឬចែកសន្លឹកកិច្ចការទៅឲ្យសិស្ស៕