COVID-19
ជាតិ
កម្ពុជា មានវ៉ាក់សាំងSinovac ២លានដូសទៀត សម្រាប់ធ្វើជាដូសទី៣
× វ៉ាក់សាំងកូវីដ-១៩ប្រភេទស៊ីណូវ៉ាក់ (Sinovac) ចំនួន២លានដូសបន្ថែមទៀត បានដឹកមកដល់ប្រទេសកម្ពុជា នៅព្រឹកថ្ងៃទី៣១ ខែសីហានេះ ដែលធ្វើឱ្យកម្ពុជាមានវ៉ាក់សាំងកូវីដ-១៩ សរុប២៧លានដូស។
បើតាមប្រមុខរដ្ឋាភិបាល វ៉ាក់សាំងទាំង២លានដូសដែលកម្ពុជាបញ្ជាទិញនេះ នឹងប្រើសម្រាប់ការចាក់ដូសជំរុញ ជូនប្រជាពលរដ្ឋ ដែលចាក់រួចទាំង២ដូសរួចហើយ។ សម្តេច ហ៊ុន សែន បានសរសេរនៅលើទំព័រហ្វេសប៊ុកយ៉ាងដូច្នេះ៖«វ៉ាក់សាំងបង្ការជំងឺកូវីដ១៩ ស៊ីណូវ៉ាក់ (Sinovac) ចំនួន២លានដូសបន្ថែមទៀតបានដឹកមកដល់ប្រទេសកម្ពុជាយើងហើយ ដើម្បីបម្រើដល់ដំណើរការចាក់ដូសជំរុញជូនប្រជាពលរដ្ឋ»។
កម្ពុជាបានបើកយុទ្ធនាការចាក់វ៉ាក់សាំងជំរុញ នៅដើមខែសីហា លើក្រុមគ្រូពេទ្យ និងមន្ត្រីរាជការជួរមុខ ក៏ដូចជាក្រុមពលរដ្ឋដែលមានហានិភ័យខ្ពស់។ គិតត្រឹមថ្ងៃទី៣០ ខែសីហា ពលរដ្ឋដែលបានចាក់វ៉ាក់សាំងដូសទី៣ មានជាង ៦១ម៉ឺននាក់ហើយ។ នេះបើតាមរបាយការណ៍របស់ក្រសួងសុខាភិបាល ដែលបន្តទៀតថា បច្ចុប្បន្នកម្ពុជាបានចាក់វ៉ាក់សាំងដល់ពលរដ្ឋ ជិត១០,៧លាននាក់ ឬស្មើនឹង ៦៦,៨៤ភាគរយ បើធៀបនឹងចំនួនប្រជាជន១៦លាននាក់ ដោយក្នុងនោះមានកុមារ និងយុវវ័យ ជាង១,៥១លាននាក់ និងពលរដ្ឋអាយុចាប់ពី១៨ឆ្នាំឡើង ជាង៩, ១៧នាក់។ ក្នុងចំណោមពលរដ្ឋទាំងជាង១០,៧លាននាក់នោះ មាន ៨,៤៥លាននាក់ បានចាក់វ៉ាក់សាំងគ្រប់ទាំង២ដូស។
គិតត្រឹមដំណាច់ខែសីហានេះ កម្ពុជាមានវ៉ាក់សាំងកូវីដ-១៩ ប្រមាណ ២៧លានដូសហើយក្នុងនោះវ៉ាក់សាំងស៊ីណូហ្វាមមាន ៦,៧លានដូស វ៉ាក់សាំង Sinovac មានជាង១៦,៥លានដូស។ ក្រៅពីនេះ អាមេរិកក៏បានផ្ដល់វ៉ាក់សាំង Jonhson &Jonhson ជាង១លានដូស តាមរយៈCOVAX។ រីឯជប៉ុនផ្ដល់វ៉ាក់សាំង AstraZeneca ១,៣ លានដូស ខណៈអង់គ្លេសផ្ដល់វ៉ាក់សាំងប្រភេទនេះឱ្យកម្ពុជា ចំនួន៤១ម៉ឺនដូសដែរ។ ចំណែកកម្មវិធី COVAX ក៏បានផ្ដល់វ៉ាក់សាំង AstraZeneca ចំនួន៣២៤,០០០ដូសផងដែរ៕
© រក្សាសិទ្ធិដោយ thmeythmey.com