លោក ឡុង កុសល អ្នកនាំពាក្យអាជ្ញាធរជាតិអប្សរា បានប្រាប់សារព័ត៌មានថ្មីៗ២៥ថា ភាពទ្រុឌទ្រោម នៃប្រាសាទភិមានអាកាស ដោយសារកត្តាអាយុកាល និងធម្មជាតិ ហើយអាជ្ញាធរកំពុងសិក្សា ដើម្បីមានការជួសជុលជាបន្ទាន់ ក្នុងពេលឆាប់ៗ។ អ្នកនាំពាក្យរូបនេះបន្តថា៖« ប្រាសាទភិមានអាកាស ទ្រុឌទ្រោមជណ្តើរផង ផ្នែកផ្សេងៗទៀតដូចជា ផ្នែកខាងក្រោមនៃប្រាសាទ និងផ្នែកខាងលើនៃប្រាសាទក៏មានបញ្ហាដូចគ្នាដែរ។ និយាយរួម វាទ្រុឌទ្រោម ហើយយើងត្រូវការសិក្សា ជួសជុលជាបន្ទាន់»។ 
 

ប្រាសាទភិមានអាកាស ជាប្រាសាទមួយដ៏សំខាន់ ដែលស្ថិតនៅចំកណ្តាលបរិវេណអតីតព្រះរាជវាំងអង្គរធំ។ នាពេលបច្ចុប្បន្ន ប្រាសាទនេះ បានទាក់ទាញភ្ញៀវទេសចរជាច្រើនទៅលេងកម្សាន្ត និងមានបងប្អូនមួយចំនួនអញ្ជើញទៅបួងសួងសុំសេចក្តីសុខផងដែរ។
 

ប្រាសាទភិមានអាកាស ឬប្រាសាទវិមានអាកាស សង់ឡើងក្នុងរាជ្យព្រះបាទជ័យវរ្ម័ន នៅដើមសតវត្សទី១១។  ប្រាសាទនេះ សង់អំពីថ្មភក់នៅផ្នែកខាងលើ ដោយជើងគ្រឹះធ្វើពីថ្មបាយក្រៀមមានបីជាន់ស្រដៀងនឹងប្រាសាទពីរ៉ាមីដ នៅអេហ្សីបដូច្នោះដែរ ។ កម្ពស់នៃជើងគ្រឹះប្រាសាទវិមានអាកាសទាំងបីជាន់មានប្រវែងប្រហែលជា ១២ ម៉ែត្រមានសណ្ឋានបួនជ្រុងទ្រវែងមានជណ្តើរចោតទាំងបួនផ្នែក៕