ការអូសបន្លាយនៃជំងឺកូវីដ-១៩ ក្នុងសាកលលោក បានធ្វើឱ្យការធ្វើដំណើររបស់ជនបរទេសមានការថយចុះ ព្រោះការរឹតត្បិតការធ្វើដំណើរ គួបផ្សំនឹងការខ្លាចជំងឺកូវីដ-១៩។ ជាក់ស្ដែងជាង ១ឆ្នាំមកកម្ពុជាមិនបើកទទួលទេសចរបរទេសទេ ដែលនាំឱ្យប៉ះពាល់ដល់អាជីវកម្មទេសចរណ៍ និងអាជីវកម្មដឹកភ្ញៀវទេសចរ។ ទោះជាយ៉ាងនេះក្ដី ចលនាការធ្វើដំណើររបស់ជនបរទេស ក្នុងការធ្វើធុរកិច្ចក៏បានចូលរួមជំរុញអាជីវកម្មទេសចរណ៍បានមួយកម្រិតផងដែរ។
 

ជាក់ស្ដែងក្នុងខែកក្កដាកន្លងទៅ ភ្ញៀវអន្តរជាតិធុរកិច្ចជិត ១ម៉ឺននាក់បានធ្វើដំណើរកម្ពុជា តាមច្រកទ្វារអន្តរជាតិភ្នំពេញ ដោយផ្លូវអាកាស និងផ្លូវគោក។ ការមកដល់របស់ជនបរទេសទាំងនោះ បានជួយផ្ដល់ចំណូលដល់ម្ចាស់អាជីវករ តាមរយៈការធ្វើចត្តាឡីស័ក និងការធ្វើដំណើរ។
 

ភ្ញៀវធុរកិច្ចមកកម្ពុជាក្នុងខែកក្កដា គឺមានជនជាតិថៃ ៤ ១៤១នាក់, ចិន ២ ៧៣១នាក់, វៀតណាម ៥៦២នាក់, អាម៉េរិក ៤៧១នាក់, កូរ៉េខាងត្បូង ៣៣៨នាក់, តៃវ៉ាន់ ២៩៣នាក់, បារាំង ២២២នាក់, ឥណ្ឌូនេស៊ី ១៧៧នាក់, ម៉ាឡេស៊ី ១២២នាក់ និងហ្វីលីពីន ១១៣នាក់។
 

កន្លងមកលោក តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានផ្ដល់បទសម្ភាសដល់សារព័ត៌មាន ThmeyThmey25 តាមតេលេក្រាមថា ភ្ញៀវអន្តរជាតិធុរកិច្ចទាំងនោះ ពេលមកដល់កម្ពុជាក៏បានធ្វើឱ្យវិស័យទេសចរណ៍មានសកម្មភាពដែរ​ ព្រោះក្រៅពីធ្វើធុរកិច្ច ភ្ញៀវទាំងនោះក៏បានដើរកម្សាន្តតាមតំបន់ទេសចរណ៍។« ភ្ញៀវធុរកិច្ចក៏បានជួយទេសចរណ៍មួយផ្នែកដែរ។ កាលណាមានភ្ញៀវធុរកិច្ចមក ក៏ជាឱកាសសម្រាប់ទាក់ទាញទេសចរអន្តរជាតិដែរ »។ នេះបើតាមការបញ្ជាក់របស់លោក តុប សុភ័ក កន្លងមក។
 

គួរបញ្ជាក់ផងដែរថា រយៈពេល៧ខែមកនេះ កម្ពុជាទទួលបានភ្ញៀវអន្តរជាតិធុរកិច្ចចំនួន ១១២ ៥៤៤នាក់ ខណៈភ្ញៀវទេសចរអន្តរជាតិផ្ទៃក្នុងមានចំនួន ១៤៦​ ០២៤នាក់៕​