តាមផែនការ តំបន់ដែលមានសុវត្ថិភាពក្នុងប្រទេសថៃ នឹងបើកទទួលទេសចរវិញចាប់ពីដើមខែតុលា ឆ្នាំ២០២០ ខណៈប្រទេសទាំងមូលអាចនឹងបើកទទួលទេសចរអន្តរជាតិដោយមិនចាំបាច់ចត្តាឡីស័ក ក្នុងខែមករាឆ្នាំ២០២២។ ការបើកទទួលទេសចរអន្តរជាតិក្នុងប្រទេសថៃ គឺធ្វើឡើងតាមវិធានការធ្វើដំណើរពិសេសដែលអនុញ្ញាតឱ្យទេសចរទៅពីប្រទេសដែលមានហានិភ័យនៃជំងឺកូវីដ-១៩ ទាប ឱ្យទៅកម្សាន្តនៅប្រទេសថៃ។ 
 

រដ្ឋមន្រ្តីទេសចរណ៍ថៃ Phiphat Ratchakitprakarn និយាយក្នុងកិច្ចប្រជុំរវាងក្រសួង និងអាជ្ញាធរទេសចរណ៍ថា ខេត្តឈៀងមៃ ហួហ៊ីន និងជលបុរី ដែលបានរៀបចំស្តង់ដាសុវត្ថិភាពរួច នឹងបើកទទួលទេសចរតាមការគ្រោងទុកក្នុងខែតុលានេះ។ ដោយឡែក ខេត្តពេជ្របូរណ៌ ក៏កំពុងប្រញាប់រៀបចំស្តង់ដាសុវត្ថិភាពឱ្យបានរួចរាល់ ដើម្បីបើកទទួលភ្ញៀវក្នុងខែតុលានេះដែរ។
 

ដោយឡែក ការបើកទទួលទេសចរនៅរាជធានីបាងកក នឹងត្រូវពន្យារសិន។ បើតាមកាសែតបាងកកប៉ុស្តិ៍ លោក Phiphat បញ្ជាក់ថា ក្រុងបាងកក គ្រោងបើកទទួលទេសចរក្នុងខែតុលា ប៉ុន្តែដោយសារប្រជាជនក្នុងតំបន់ត្រូវចាក់វ៉ាក់សាំងដូសទី២រួចរាល់ចុងខែតុលា ដូច្នេះការបើកទីក្រុងបាងកក ត្រូវពន្យាពេលដល់ខែវិច្ឆិកាវិញ។
 

ជាមួយគ្នានេះដែរ ថៃកំពុងប្រញាប់ រៀបចំស្តង់ដារសុវត្ថិភាពSOP ក្នុងប្រទេសឱ្យបានរួចរាល់ ក្នុងឆ្នាំនេះ ដើម្បីបើកទទួលទេសចរនៅដើមឆ្នាំក្រោយ៕