ប៉ូលិសវៀតណាម នៅថ្ងៃទី៧ ខែកញ្ញា បានចាប់ខ្លួនលោក Truong Manh Thao ដែលជាមន្រ្តីសង្កាត់ទី៦ ក្នុងក្រុងហូជីមិញ។ លោក Thao  ត្រូវបានចោទពីបទរំលោភអំណាច ក្នុងការបំពេញតួនាទីជាមន្រ្តី។ លោកត្រូវបានជឿថា បានសហការជាមួយមនុស្សប្រមាណ ២០នាក់ ដែលមិនស្ថិតក្នុងក្រុមអាទិភាព ទទួលវ៉ាក់សាំងបង្ការជំងឺកូវីដ-១៩ ។ លោក បានរៀបចំឱ្យអ្នកទាំងនោះទទួលវ៉ាក់សាំងបង្ការជំងឺកូវីដ-១៩ ដើម្បីជាថ្នូរនឹងប្រាក់ និងវត្ថុមានតម្លៃផ្សេងទៀត។

 

តាមការចុះផ្សាយរបស់សារព័ត៌មាន Vietnam Express លោក Thao បានសារភាពថា​ លោកបានទទួលប្រាក់ប្រមាណ ៤៣៩ដុល្លារ ឬ១០លានដុង ពីកិច្ចព្រមព្រៀងនោះ ។ 

 

មុនការចាប់ខ្លួនមន្រ្តីខាងលើមួយថ្ងៃ លោកវេជ្ជបណ្ឌិត Nguyen Thai Hiep ដែលធ្វើការនៅមជ្ឈមណ្ឌលវេជ្ជសាស្រ្ត ក្នុងខេត្តBinh Duong រួមទាំងសន្តិសុខមួយរូបផង ក៏ត្រូវបានឃុំខ្លួនដោយប៉ូលិសដែរ។ លោក Hiep ត្រូវបានចោទថា បានសហការជាមួយសន្តិសុខ ដើម្បីប្រមូលប្រាក់ពីប្រជាជន ដែលចង់ចាក់វ៉ាក់សាំងបង្ការជំងឺកូវីដ-១៩ ។ តាមរយៈភាគីទីបី សន្តិសុខរូបនោះ បានអនុញ្ញាតឱ្យប្រជាជនដែលមិនមែនជាក្រុមអាទិភាព ចូលទៅមណ្ឌលវេជ្ជសាស្រ្ត ដើម្បីចាក់វ៉ាក់សាំង ជាថ្នូរនឹងទឹកប្រាក់ប្រមាណ ២៦ដុល្លារ។ 

 

ប៉ូលិសខេត្ត Binh Duong បានអះអាងថា សន្តិសុខរូបនោះ បានសារភាព បានសហការជាមួយលោកវេជ្ជបណ្ឌិត ដើម្បីផ្តល់វ៉ាក់សាំងបង្ការជំងឺកូវីដ-១៩ ដោយប្រមូលបានថវិកា បានប្រមាណ ៧៦៧ដុល្លារ ឬ ១៧,៥លានដុង។ ប៉ុន្តែមកទល់ពេលនេះ លោកវេជ្ជបណ្ឌិត បានទាន់មិនឆ្លើយជាសាធារណៈឡើយ។ 

 

កន្លងមក រដ្ឋាភិបាលវៀតណាម បានកើនរំលឹកថា ការចាក់វ៉ាក់សាំងបង្ការជំងឺកូវីដ-១៩ នឹងត្រូវផ្តល់ឱ្យដោយឥតគិតថ្លៃ។ បុគ្គលដែលស្ថិតនៅក្នុងក្រុមអាទិភាពមានដូចជា គ្រូពេទ្យ ប៉ូលិស និងអ្នកសារព័ត៌មានជាដើម។ 

 

មកទល់ពេលនេះ វៀតណាម បានផ្តល់វ៉ាក់សាំងបង្ការជំងឺកូវីដ-១៩ ដល់ប្រជាជនច្រើនជាង ២២លាននាក់ សម្រាប់វ៉ាក់សាំងមួយដូស ខណៈប្រជាជនចំនួន​ ៣,៣លាននាក់ បានទទួលវ៉ាក់សាំងពេញលេញ៕