ក្នុងផែនការដែលប្រកាសលើគេហទំព័ររដ្ឋាភិបាលម៉ាឡេស៊ីនៅថ្ងៃទី៧ ខែសីហា អ្នកចាក់វ៉ាក់សាំងបង្ការ ជំងឺកូវីដ-១៩ ពេញលេញតែប៉ុណ្ណោះ ទើបអាចចូលរោងភាពយន្តបាន។ រោងកុននីមួយៗត្រូវបាន អនុញ្ញាតឱ្យផ្ទុកចំនួនមនុស្សពាក់កណ្ដាលនៃចំនួនកៅអីសរុប។ ចំណែកឯសាលផ្សេងៗទៀតដូចជា រោងសម្ដែងសិល្បៈ​ សារមន្ទីរ និងសាលវិចិត្រសិល្បៈ ត្រូវបានអនុញ្ញាតឱ្យផ្ទុកមនុស្សចំនួន៣០ភាគរយ តែប៉ុណ្ណោះ។

 

នាយករដ្ឋមន្ត្រីម៉ាឡេស៊ី អ៊ីស្មាអ៊ីល សាប្រ៊ី យ៉ាកុប លើកឡើងថា ការសម្តែងផ្ទាល់ដូចជា តន្រ្តីល្ខោន និង ការសម្ដែងកំប្លែងអាចចាប់ផ្តើមឡើងវិញ ដែលរោងសម្ដែងទាំងនោះក៏ត្រូវផ្ទុកមនុស្សតែ៣០ភាគរយនៃ កៅអីសរុប ហើយសម្រាប់តែមនុស្សដែលបានចាក់វ៉ាក់សាំងពេញលេញដែរ។ លោក អ៊ីស្មាអ៊ីល បន្តថា ការសម្រេច ចិត្តនេះស្ថិតក្នុងចំណោមកិច្ចប្រឹងប្រែងឥតឈប់ឈររបស់រដ្ឋាភិបាលក្នុងការជំរុញ សក្តានុពលសេដ្ឋកិច្ចរបស់សិល្បករ និងឧស្សាហកម្មច្នៃប្រឌិត ហើយការបន្ថូរបន្ថយនេះ នឹងអាចផ្ដល់ ផលប្រយោជន៍ដល់ក្រុមហ៊ុនក្នុងវិស័យសិល្បៈចំនួនជាង២ម៉ឺនក្រុមហ៊ុនឯណោះ។
 

នាយករដ្ឋមន្ត្រីរូបនេះក៏បានអះអាងថា រដ្ឋាភិបាលតែងតែប្តេជ្ញាប្រកាន់យកវិធីសាស្រ្តល្អបំផុតដែល អាចធានាដល់ការស្តារសេដ្ឋកិច្ចរបស់ប្រទេសឡើងវិញ និងប្ដេជ្ញានាំម៉ាឡេស៊ីឱ្យឈានទៅរក ដំណាក់កាលស៊ាំនឹងជំងឺកូវីដ-១៩ ត្រឹមខែតុលាខាងមុខនេះ។

 

គួរបញ្ជាក់ថា បន្ទាប់ពីរោងកុនត្រូវបានបិទជាងមួយឆ្នាំមកនេះ ប្រតិបត្តិកររោងកុនបានខាតបង់ប្រាក់ ជាង១៤៤លានដុល្លារ ហើយបានប៉ះពាល់អ្នកធ្វើការក្នុងវិស័យនេះចំនួនជាង២ម៉ឺននាក់៕