គណៈសង្ឃនាយក ក្រើនរំលឹកដល់គ្រប់វត្ត ត្រូវអប់រំភិក្ខុ និងសាមណេរដោយព្រហ្មវិហារធម៌

ជាតិ

គណៈសង្ឃនាយក ក្រើនរំលឹកដល់គ្រប់វត្ត ត្រូវអប់រំភិក្ខុ និងសាមណេរដោយព្រហ្មវិហារធម៌

08, Sep 2021 , 9:59 pm

រូបភាព

ដោយ: ប៉ូ សាគុន

ភ្នំពេញ៖ ព្រះមេគណ ព្រះគ្រូអនុគណ ព្រះចៅអធិការវត្ត និងអ្នកគ្រប់គ្រងតាមវត្តទាំងអស់ នៅទូទាំងប្រទេសកម្ពុជា គប្បីមើលថែរក្សា និងអប់រំណែនាំភិក្ខុ សាមណេរ និងសិស្សានុសិស្ស ព្រមទាំងកុមារ ឬកុមារកំព្រាគ្មានទីពឹង ដែលមកស្នាក់អាស្រ័យនៅក្នុងវត្តជាមួយព្រះសង្ឃ ប្រកបដោយព្រហ្មវិហារធម៌ទាំង៤។ នេះជាសេចក្ដីប្រគេនដំណឹងរបស់ គណៈសង្ឃនាយក នៃព្រះរាជាណាចក្រកម្ពុជា។

សម្ដេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយក បានមានព្រះបន្ទូលប្រាប់សារព័ត៌មានថ្មីៗថា សេចក្ដីប្រគេនដំណឹងនេះ ជាការក្រើនរំលឹកបន្ថែម ដល់ ព្រះមេគណ ព្រះអនុគណ ព្រះចៅអធិការ និងអ្នកគ្រប់គ្រងតាមវត្តទាំងអស់ នៅទូទាំងប្រទេសកម្ពុជា ឱ្យគ្រប់គ្រងនិងអប់រំ បុគ្គលសង្ឃ និងក្មេងៗឱ្យបានល្អ ដោយប្រាសចាកពីអំពើហិង្សាទាំងពួង។

ព្រះអង្គមានព្រះបន្ទូលបន្ថែមថា គ្រប់វត្តត្រូវគ្រប់គ្រង និងចិញ្ចឹមពួកគេ ប្រកបដោយភាពវិជ្ជមាន ដោយអប់រំប្រកបដោយសេចក្ដីសន្តោស មេត្តាករុណា មុទិតា ឧបេក្ខា និងការអត់ឱន ដើម្បីឱ្យអ្នកមកស្នាក់អាស្រ័យនោះ មានភាពកក់ក្ដៅ និងទទួលបានការសិក្សារៀនសូត្រជ្រៅជ្រះ ទាំងផ្លូវលោកនិងផ្លូវធម៌។

ព្រះអង្គ ឃឹម សន មានព្រះបន្ទូលបញ្ជាក់៖«កន្លងមកមានកើតខ្លះៗដែរ អំពីការអប់រំក្នុងវត្តដោយប្រើអំពើរហិង្សា ដូច្នេះគណសង្ឃនាយក ចង់ឱ្យមានការអប់រំដោយមេត្តា និងព្រហ្មវិហាធម៌ចំពោះភិក្ខុ សាមណេរ និងសិស្សានុសិស្ស ព្រះទាំងកុមារ ដែលស្នាក់នៅក្នុងវត្ត»។

សេចក្ដីប្រគេនដំណឹងរបស់គណៈសង្ឃនាយក ក៏បានសង្កត់ធ្ងន់ថា គ្រប់វត្តត្រូវចៀសវាងការប្រព្រឹត្តិអំពើហិង្សាគ្រប់ទម្រង់ គោរពសេចក្ដីថ្លៃថ្នូររបស់ភិក្ខុ សាមណេរ និងសិស្សានុសិស្ស ព្រមទាំងកុមារឬកុមារកំព្រាគ្មានទីពឹង។ មិនត្រូវពាក់ព័ន្ធនឹងសកម្មភាពផ្លូវភេទ ឬអាកប្បកិរិយាជំរុញផ្លូវភេទ ។ មិនត្រូវប្រើឱ្យធ្វើការងារណា ដែលអាចបង្កគ្រោះថ្នាក់ដល់ការអភិវឌ្ឍ។

មិនត្រូវពាក់ព័ន្ធនឹងការកេងប្រវ័ញ្ច និងត្រូវដាក់ទណ្ឌកម្មដោយយកធម៌វិន័យ ជំនួសឱ្យការប្រើប្រាស់អំពើហិង្សាគ្រប់រូបភាព និងគ្រប់ទម្រង់ លើ ភិក្ខុ សាមណេរ និងសិស្សានុសិស្ស ព្រមទាំងកុមារ ឬកុមារកំព្រាគ្មានទីពឹង៕