បើតាមទីភ្នាក់ងារព័ត៌មានរដ្ឋចិន Xinhua លោក ស៊ី ជិនភីង បានទទួលការហៅតាមទូរស័ព្ទពីសមភាគីអាម៉េរិក ចូ បៃឌិន នៅព្រឹកថ្ងៃទី១០ ខែកញ្ញា។ មេដឹកនាំទាំងពីរបានពិភាក្សាពីយុទ្ធសាស្ត្រស៊ីជម្រៅ និង ទូលំទូលាយក្នុងទំនាក់ទំនងទ្វេភាគីចិន-អាម៉េរិក និងបញ្ហាពាក់ព័ន្ធដែលមានការព្រួយបារម្ភដូចគ្នា។ លោក ស៊ី សង្កត់ធ្ងន់ថា ទំនាក់ទំនងប្រទេសទាំងពីរមានសារសំខាន់ និងជាកត្តាកំណត់វាសនារបស់ ពិភពលោកនៅពេលអនាគត។ 

 

«នៅពេលចិន និងអាម៉េរិកសហការគ្នា ប្រទេសទាំងពីរ និងពិភពលោក នឹងទទួលបានប្រយោជន៍។ នៅពេលចិន និងអាម៉េរិកប្រឈមមុខគ្នា ប្រទេសទាំងពីរ និងពិភពលោកជួបទុក្ខភ័យ។» លោក ស៊ី ប្រាប់លោក បៃឌិន បែបនេះមុនបន្ថែមថា ការធ្វើឱ្យទំនាក់ទំនងប្រទេសទាំងពីរដើរផ្លូវត្រូវ ពុំមែនជាជម្រើសឡើយ តែជាអ្វីដែលប្រទេសទាំងពីរត្រូវតែធ្វើ ហើយធ្វើឱ្យល្អប្រសើរថែមទៀត។

 

កិច្ចសន្ទនាតាមទូរសព្ទរវាងមេដឹកនាំមហាអំណាចទាំងពីរ ធ្វើឡើងស្របពេលដែលទំនាក់ទំនងរវាងប្រទេសទាំងពីរកំពុងយ៉ាប់យ៉ឺន ដោយរដ្ឋបាលលោក បៃឌិន ហាក់ប្រកាន់ជំហររិះគន់ចិនលើបញ្ហាជាច្រើន។ លោក ស៊ី ប្រាប់លោក បៃឌិន ថា អាម៉េរិកបានប្រើប្រាស់គោលនយោបាយបរទេសគាបសង្កត់ ចិនដែលការណ៍នេះបណ្ដាលឱ្យទំនាក់ទំនងកាន់តែល្អក់កករតាមនោះ។ លោក ស៊ី ស្នើអាម៉េរិក ឱ្យគោរពផលប្រយោជន៍ទាំងសងខាង និងចូលរួមសហការដោះស្រាយបញ្ហាដែលមានជំហរស្របគ្នា។

 

ចំណែកក្នុងសេចក្តីថ្លែងការណ៍របស់សេតវិមានវិញ ប្រធានាធិបតីទាំងពីរ បានពិភាក្សាគ្នាអំពីបញ្ហា ដែលមានផលប្រយោជន៍រួមគ្នាផងដែរ។ លោក បៃឌិន ក៏យល់ព្រមជាមួយលោក ស៊ី ក្នុងការ ដោះស្រាយបញ្ហាតាមការពិភាក្សាត្រង់ៗ និងបើកចំហរ។

 

ក្នុងកិច្ចសន្ទនា៩០នាទីនេះដែរ មេដឹកនាំអាម៉េរិក ក៏ព្រមានពីការយល់ច្រឡំពីគោលបំណងរបស់គ្នាទៅវិញទៅមក ដែលនាំដល់ការប្រឈមមុខរវាងទីក្រុងប៉េកាំង និងទីក្រុងវ៉ាស៊ីនតោន។ នេះបើតាមការបញ្ជាក់របស់សេតវិមាន៕