ថ្លែងបានសារព័ត៌មានថ្មីៗតាមទូរសព្ទនៅរសៀលនេះ អភិបាលខេត្តសៀមរាប លោក ទៀ សីហា មានប្រសាសន៍ថា ក្រោយមានកិច្ចពិភាក្សាជាបន្ទាន់មួយ លោកសម្រេចបិទក្រុងសៀមរាបមួយសប្ដាហ៍ ឬ៧ថ្ងៃ ក្នុងបំណងដើម្បីកាត់ផ្ដាច់ការចម្លងជំងឺកូវីដ-១៩ ក្នុងសហគមន៍ ខណៈដែលបច្ចុប្បន្នតួលេខអ្នកឆ្លងក្នុងក្រុងហាក់មានការកើនឡើងមិនស្រាកស្រាន្ត។ លោកបញ្ជាក់ថា ប្រសិនបើការបិទបណ្ដោះអាសន្ន៧ថ្ងៃនេះ មានការធូរស្រាល និងអាចរកឃើញអ្នកជំងឺកូវីដ-១៩បានទាន់ពេលវេលានោះ អ្វីៗនឹងល្អប្រសើរវិញ។ 

 

លោកមានប្រសាសន៍ថា៖« ការបិទនេះ មិនមែនធ្វើបាបបងប្អូនប្រជាពលរដ្ឋទេ តែគ្រាន់ថា ជាការចាំបាច់ ត្រូវកាត់ផ្ដាច់ប្រភពចម្លង សូមឱ្យគាត់ {ប្រជាពលរដ្ឋ} អត់ធ្មត់ក្នុងរយៈពេល៧ថ្ងៃ ដើម្បីចូលរួមជាមួយគ្នា»។ 

 

លោក ទៀ សីហា បន្ថែមថា វិធានការនេះធ្វើឡើងក៏ដោយសារការសង្កេតឃើញថា ក្រុងសៀមរាប ពិសេសបណ្ដាស្រុកជុំវិញស្ថិតនៅតាមបណ្ដោយផ្លូវជាតិលេខ៦ មានករណីផ្ទុះការឆ្លងជំងឺកូវីដ-១៩ ជាបន្តបន្ទាប់មិនស្រាកស្រាន្តសោះនារយៈពេល១០ថ្ងៃចុងក្រោយនេះ។ ពិសេសនោះគឺប្រជាពលរដ្ឋ និងអាជីវករមួយចំនួន នៅមិនទាន់ចូលរួមអនុវត្តវិធានការសុខាភិបាល ក៏ដូចជាការណែនាំរបស់រដ្ឋបាលខេត្ត គឺនៅតែមានការជួបជុំ និងលក់គ្រឿងស្រវឹងជាដដែល។ លោកបញ្ជាក់ថា អាជ្ញាធរនឹងចុះទៅទីប្រជុំជន និងតាមទីផ្សារ ដើម្បីពិនិត្យស្ថានភាពជាក់ស្ដែង ហើយនឹងឈានដល់ការផាកពិន័យតែម្ដង។

 

សូមបញ្ជាក់ថា រដ្ឋបាលខេត្តសៀមរាប មិនទាន់ចេញលិខិតផ្លូវការជុំវិញករណីបិទខ្ទប់ក្រុងសៀមរាប ដាក់ជាតំបន់លឿងទុំ ថានៅពេលណានោះទេ តែអភិបាលខេត្តប្រាប់ថា ក្រុមការងារកំពុងរៀបចំឯកសារ ដើម្បីប្រកាសជាផ្លូវការនាពេលឆាប់ៗនេះ។ លោកស្នើសុំឱ្យពលរដ្ឋកុំស្លន់ស្លោ ព្រោះថាទីផ្សារនៅតែបើកជាធម្មតា គ្រាន់តែការចេញចូលផ្ទះ ឬកន្លែងស្នាក់អាស័យ គឺទាល់តែមានករណីចាំបាច់តែប៉ុណ្ណោះ។ លោកអភិបាល ក៏ទទូចឱ្យពលរដ្ឋចូលរួម និងសហការដើម្បីឱ្យការងារនេះសម្រេចបានជាផ្លែផ្កាទាំងអស់គ្នា ក៏ដូចជាដើម្បីឱ្យស្ថានការណ៍វិលត្រឡប់មករកសភាពដើមវិញ៕