១. បញ្ឈប់ការជក់បារី

 

​អ្នកជំនាញជាច្រើនបានឱ្យដឹងថាការជក់បារី គឺជាកត្តាចម្បងបំផុតមួយដែលធ្វើឱ្យការអស់រដូវកើតឡើងលឿនជាងធម្មតា។ នេះក៏ព្រោះតែបារីមានផ្ទុកសម្បូរទៅដោយសារធាតុពុលជាពិសេសសារធាតុកាបូនម៉ូណូអុកស៊ីត, នីកូទីន និងសារធាតុ cyanide។

 

២. គ្រប់គ្រងទម្ងន់ឱ្យបានត្រឹមត្រូវ

 

ការរក្សាបាននូវទម្ងន់រាងកាយត្រឹមត្រូវ គឺល្អណាស់សម្រាប់គ្រប់គ្នា ខណៈដែលភាពធាត់ជ្រុលអាចបង្កើនហានិភ័យនៃបញ្ហាសុខភាពជាច្រើន។ ការអស់រដូវមុនឈានដល់វ័យជាបញ្ហាសុខភាពមួយក្នុងចំណោមនោះ! វេជ្ជបណ្ឌិតជាច្រើនបានឱ្យដឹងថា ជាតិខ្លាញ់លើសប្រមាណក្នុងរាងកាយអាចបណ្ដាលឱ្យអ័រម៉ូនស្ត្រី estrogen ធ្លាក់ចុះដែលជាលទ្ធផលនៃបញ្ហាអតុល្យភាពអ័រម៉ូនបង្កជាការអស់រដូវមុនឈានដល់វ័យ។

 

៣. ធ្វើលំហាត់ប្រាណឱ្យបានទៀងទាត់

 

មួយក្នុងចំណោមវិធីដ៏ល្អបំផុតដើម្បីកម្ចាត់ ឬទប់ទល់ជាមួយបញ្ហាធាត់លើសទម្ងន់នោះ គឺការធ្វើលំហាត់ប្រាណឱ្យបានទៀងទាត់។ វាក៏ជួយរក្សាតុល្យភាពនៃអ័រម៉ូនក្នុងរាងកាយផងដែរ។ ជាលទ្ធផលទប់ស្កាត់ការអស់រដូវលឿនខុសធម្មតា។ ទោះជាយ៉ាងណាក៏ដោយ អ្នកមិនត្រូវខំធ្វើលំហាត់ប្រាណខ្លាំងជ្រុលពេកដែរ ក៏ព្រោះវាអាចបណ្ដាលឱ្យអ័រម៉ូនធ្លាក់ចុះ។

 

៤. កម្រិតការទទួលទានកាហ្វេអ៊ីននិងគ្រឿងស្រវឹង

 

ក្នុងកម្រិតមធ្យម, អាហារនិងភេសជ្ជៈដែលមានផ្ទុកជាតិកាហ្វេអ៊ីន ឬគ្រឿងស្រវឹងអាចផ្ដល់អត្ថប្រយោជន៍ល្អចំពោះសុខភាព។ ទោះជាយ៉ាងណាប្រសិនបើអ្នកមិនចង់ជួបប្រទះបញ្ហាអស់រដូវលឿនជាងធម្មតាទេនោះ ចូរកម្រិតការទទួលទានភេសជ្ជៈ ឬអាហារដែលមានផ្ទុកជាតិកាហ្វេអ៊ីននិងគ្រឿងស្រវឹង។

 

៥. រួមបញ្ចូលត្រីក្នុងរបបអាហារប្រចាំថ្ងៃ

 

ត្រី ជាពិសេសត្រីសាលម៉ុន និងត្រីធូណាមានផ្ទុកសម្បូរទៅដោយអាស៊ីតខ្លាញ៉អូមេហ្កា ៣ ដែលល្អណាស់សម្រាប់ជួយគ្រប់គ្រងតុល្យភាពអ័រម៉ូនទប់ស្កាត់បញ្ហាអស់រដូវមុនឈានដល់វ័យ។

 

៦. ព្យាយាមគ្រប់គ្រងកម្រិតនៃភាពស្ត្រេស

 

ប្រសិនបើមិនចង់អស់រដូវមុនឈានដល់វ័យទេនោះ ចូរព្យាយាមគ្រប់គ្រងភាពស្ត្រេសរបស់អ្នកកុំឱ្យខ្ពស់ពេក។ នេះក៏ព្រោះតែភាពតានតឹងក្នុងអារម្មណ៍អាចបណ្ដាលឱ្យមានបញ្ហាអតុល្យភាពនៃអ័រម៉ូនក្នុងរាងកាយ៕

 

ត្រួតពិនិត្យ​ដោយ www.health.com.kh