លោក គីស៊ី ណូបុ (Kishi Nobuo) រដ្ឋមន្ត្រីការពារជាតិជប៉ុន បានជួបជាមួយសមភាគីវៀតណាម ហ្វាន់ វ៉ាន់ហ្សាង ( Phan Van Giang) នៅថ្ងៃទី១១ ខែកញ្ញាក្នុងដំណើរទស្សនកិច្ចនៅទីក្រុងហាណូយ ។ ក្នុងដំណើរទស្សនកិច្ចនេះ ភាគីទាំងពីរ បានចុះហត្ថលេខាលើកិច្ចព្រមព្រៀងផ្ទេរសព្វាវុធ និងបច្ចេកវិទ្យាយោធា ដែលនឹងបើកផ្លូវឱ្យជប៉ុននាំចេញអាវុធយុទ្ធភណ្ឌ និងគ្រឿងបរិក្ខារយោធាទៅកាន់វៀតណាម។

 

ក្នុងសេចក្ដីប្រកាសព័ត៌មានរបស់ក្រសួងការពារជាតិជប៉ុននៅថ្ងៃទី១១ ខែកញ្ញា លោក ណូបុ និងលោក ហ្សាង អះអាងថា កិច្ចសហប្រតិបត្តិការលើវិស័យយោធាទ្វេភាគីឈានដល់កម្រិតថ្មីមួយ។ ប្រមុខការពារជាតិទាំងពីរ ក៏ជំរុញ​ឱ្យមានការបើកកិច្ចពិភាក្សារួមគ្នាដើម្បីលម្អិតផែនការក្នុងការអនុវត្តកិច្ចព្រមព្រៀងខាងលើនេះ។

 

ដោយទំនងចង់សំដៅចិន ក្រសួងការពារជាតិជប៉ុនបន្តថា រដ្ឋមន្ត្រីទាំងពីរ ក៏ឯកភាពគ្នាលើការធានាសេរីភាពនាវាចរណ៍ និងការហោះហើរក្នុងតំបន់ឥណ្ឌូ-ប៉ាស៊ីហ្វិក និងការពង្រីកកិច្ចសហប្រតិបត្តិការផ្នែកសន្តិសុខសាយប័រ។ ជប៉ុន និងវៀតណាម ក៏មានផែនការពង្រឹងកិច្ចសហប្រតិបត្តិការដូចជាការរៀបចំលំហាត់យោធាពហុសាសន៍ និងទស្សនកិច្ចរបស់នាវាស្វ័យការពារជប៉ុននៅតាមកំពង់ផែវៀតណាមផងដែរ។

 

ទស្សនកិច្ចរបស់លោក ណូបុ ធ្វើឡើងចំថ្ងៃទស្សនកិច្ចរបស់រដ្ឋមន្រ្តីការបរទេសចិន វ៉ាង យី នៅទីក្រុងហាណូយ។ លោក វ៉ាង ដែលជាទីប្រឹក្សារដ្ឋផងនោះ ក៏ស្នើឱ្យវៀតណាមបញ្ចៀសការធ្វើសកម្មភាពជាឯកតោភាគីដែលបង្កបញ្ហាស្មុគស្មាញនៅសមុទ្រចិនខាងត្បូង។ 

 

ខណៈវៀតណាមទាស់គ្នាជាមួយចិននៅសមុទ្រចិនខាងត្បូង ជប៉ុន ក៏មើលមុខមិនត្រូវគ្នាជាមួយចិនរឿងសមុទ្រចិនខាងកើតលើសំណុំរឿងអធិបតេយ្យកោះ Senkaku ដែលចិនហៅថា Diaoyu ៕