ការលើកទឹកចិត្តឱ្យប្រជាជនប្រើប្រាស់យានយន្តអគ្គីសនី ក្នុងគោលបំណងដើម្បីកាត់បន្ថយការបញ្ចេញឧស្ម័នពុលចូលក្នុងបរិយាកាស បានធ្វើឱ្យឧស្សាហកម្មមួយនេះរីកដុះដាលខ្លាំង ជាមួយនឹងការបង្កើតក្រុមហ៊ុនជាច្រើន។ ប៉ុន្តែរដ្ឋមន្រ្តីឧស្សាហកម្ម និងបច្ចេកវិទ្យាព័ត៌មានចិន លោក Xiao Yaqing អះអាងថា រដ្ឋាភិបាលចិន នឹងលើកទឹកចិត្តឱ្យក្រុមហ៊ុនទាំងនោះ ច្របាច់បញ្ចូលគ្នាវិញ។
 

ក្រុមហ៊ុនផលិតរថយន្តអគ្គិសនីក្នុងស្រុកដូចជា ក្រុមហ៊ុន Nio Inc, ក្រុមហ៊ុនXpeng Inc និងក្រុមហ៊ុន BYD Co Ltd បានពង្រីកសមត្ថភាពផលិតរបស់ខ្លួនក្នុងប្រទេស ស្របពេលតម្រូវការប្រើប្រាស់កើនឡើង។ ជាមួយនឹងកំណើននេះ លោក Xiao អះអាងថា រដ្ឋាភិបាលចិននឹងធ្វើឱ្យប្រសើរឡើងបណ្តាញសាកថ្មនៃរថយន្តប្រភេទនេះ និងអភិវឌ្ឍផែនការលក់នៅតាមទីផ្សារជនបទផងដែរ។
 

ដោយសារតម្រូវកើនឡើងបែបនេះ បញ្ហាកង្វះឈីប ក៏កើតឡើងតាមនោះដែរ។ រដ្ឋមន្រ្តីឧស្សាហកម្ម និងបច្ចេកវិទ្យារបស់ចិន លើកឡើងថា ក្រសួងរបស់លោក កំពុងពន្លឿនការស្វែងរកដំណោះស្រាយបញ្ហាការផ្គត់ផ្គង់បន្ទះឈីបស្វ័យប្រវត្តិនៅចិន។
 

កាលពីសប្តាហ៍មុន និយតករទីផ្សារចិន បានផាកពិន័យក្រុមហ៊ុនលក់បន្ទះឈីបរថយន្តចំនួន៣ ដែលបានបង្កើនតម្លៃលក់ ពេលឈីបកំពុងខ្វះខាត។ ចំណាត់ការនេះ ត្រូវបានគេមើលឃើញថា មានគោលបំណងជួយដល់ការផលិតរថយន្តឱ្យបានរលូននៅក្នុងទីផ្សារផលិតរថយន្តអគ្គិសនីធំបំផុតរបស់ពិភពលោកនេះ។
 

ការខ្វះខាតបន្ទះឈីបជាសកលដែលអូសបន្លាយពេលជាយូរមកហើយនេះ ក៏បានជះឥទ្ធិពលដល់ក្រុមហ៊ុនផលិត​រថយន្តធំ ៗ រួមមាន Ford Motor, Honda Motor និង Volkswagen ដែលបង្ខំឱ្យពួកគេផ្អាកការផលិត ឬកាត់បន្ថយផលិតកម្មជាបណ្ណោះអាសន្ន៕