នាយករដ្ឋមន្ត្រីវៀតណាម ផាម មិញឈិញ បានយល់ព្រមតាមសំណើរបស់ក្រសួងវប្បធម៌ កីឡា និងទេសចរណ៍វៀតណាមលើការបើកទទួលភ្ញៀវទេសចរដែលចាក់វ៉ាក់សាំងជំងឺកូវីដ-១៩ រួច ទៅកម្សាន្តនៅកោះ Phu Quoc។​ បើតាមគេហទំព័ររដ្ឋាភិបាលវៀតណាមនៅថ្ងៃទី ១៣ ខែកញ្ញា កោះ Phu Quoc ក្នុងខេត្ត Kien Giang ជាទិសដៅទេសចរណ៍ដំបូងបំផុត ដែលរដ្ឋាភិបាលវៀតណាម នឺងបើកទទួលទេសចរអន្តរជាតិឡើងវិញ។ 
 

ប្រមុខរដ្ឋាភិបាលវៀតណាម ក៏បានឱ្យក្រសួងសុខាភិបាលធ្វើការជាមួយក្រសួងការបរទេស និងក្រសួងព័ត៌មាន និងទំនាក់ទំនងវៀមណាម ពីការពិនិត្យលើការចាក់វ៉ាក់សាំងរបស់ភ្ញៀវទេសចរ និងផ្ដល់អាទិភាព ដល់ទេសចរដែលចាក់វ៉ាក់សាំងរួចទៅកម្សាន្តនៅកោះ Phu Quoc នេះផងដែរ។ 
 

ភ្ញៀវទេសចរបរទេសដែលមានបំណងទៅកម្សាន្តនៅកោះ Phu Quoc ត្រូវទទួលបានវ៉ាក់សាំងការពារចំនួន២ដូសរួចរាល់យ៉ាងតិច១៤ថ្ងៃ និងមិនលើសពី១២ខែ។​ ជាមួយគ្នានេះដែរ ទេសចរក៏ត្រូវមានលិខិតបញ្ជាក់ថា អវិជ្ជមានជំងឺកូវីដ-១៩ តាមរយៈធ្វើតេស្តតាម PCR ក្នុងរយៈពេល៧២ម៉ោង មុនទៅដល់ប្រទេសវៀតណាម។
 

គិតមកទល់ពេលនេះប្រទេសវៀតណាមមានអ្នកឆ្លងជំងឺកូវីដ-១៩ ជាង៦១ម៉ឺននាក់ ក្នុងនោះអ្នកជាសះស្បើយជាង៣៧ម៉ឺននាក់ និងអ្នកស្លាប់ជាង១ម៉ឺននាក់៕