លោក ហ៊ុន ម៉ានី ជំរុញឱ្យក្រសួងធម្មការពន្លឿនការចាក់វ៉ាក់សាំងដល់ព្រះសង្ឃទូទាំងប្រទេស និងផ្ដល់ប្រាក់បៀវត្សផងដែរ។ តាមរយៈគណៈកម្មការអប់រំ យុវជនកីឡា ធម្មការ កិច្ចការសាសនាវប្បធម៌ និងទេសចរណ៍ នៃរដ្ឋសភា នៅថ្ងៃទី១៣ ខែកញ្ញា ឆ្នាំ២០២១ បានណែនាំឱ្យក្រសួងធម្មការ ចងបដាផ្សព្វផ្សាយមានខ្លឹមសារដូច្នេះថា៖«ចូលរួមអបអរសាទរពិធីបុណ្យកាន់បិណ្ឌ និងភ្ជុំបិណ្ឌ ព្រមទាំងជំរុញឱ្យប្រជាពលរដ្ឋបន្តអនុវត្តវិធានការ ៣ការពារ ៣កុំ»។
 

គណៈកម្មការទី៧ នៃរដ្ឋសភា និងក្រសួងធម្មការ និងសាសនា នឹងបន្តអនុវត្តយុទ្ធការប្រឆាំងកូវីដ-១៩ ដោយផ្សព្វផ្សាយពីវិធានសុវត្ថិភាព ដល់ពលរដ្ឋទូទាំងប្រទេស ពិសេសតាមទីវត្តអារាម ដើម្បីក្រើនរំលឹក និងបង្កើនការយល់ដឹង ជៀសវាងការចម្លងជំងឺអំឡុងពេលពិធីបុណ្យភ្ជុំបិណ្ឌខាងមុខ។
 

«ទោះជាយ៉ាងណា ក៏ស្ថាប័នទាំង២ ឯកភាពថា អាទិភាពចំពោះមុខ គឺការពួតដៃគ្នាប្រយុទ្ធនឹងជំងឺកូវីដ-១៩ ដោយប្រើប្រាស់ឱ្យអស់លទ្ធភាព និងកម្លាំងសរុប ដើម្បីធ្វើយ៉ាងណារក្សាអាយុជីវិត និងសុវត្ថិភាពពលរដ្ឋ សំដៅចូលរួមជាមួយរដ្ឋាភិបាល ក្នុងការជំរុញឱ្យឈានដល់ការបើកសេដ្ឋកិច្ចជាតិឡើងវិញ»។ នេះបើតាមលោក ហ៊ុន ម៉ានី ៕