ដោយមើលឃើញពីការភាពចាំបាច់ក្នុងការពង្រឹងកម្លាំងជើងទឹកនៅឥណ្ឌូ-ប៉ាស៊ីហ្វិក អាម៉េរិក អង់គ្លេស និងអូស្ត្រាលី សម្រេចបង្កើតសម្ព័ន្ធភាពថ្មី AUKUS ឡើង។ ក្នុងជំនួបតាមអនឡាញនៅថ្ងៃទី១៥ ខែកញ្ញា ប្រធានាធិបតី អាម៉េរិក ចូ​ បៃឌិន, នាយករដ្ឋមន្រ្តីអង់គ្លេស បូរីស ចនសុន ​និង​នាយករដ្ឋមន្ត្រីអូស្ត្រាលី ស្កុ​ត ម៉ូ​រី​សុន បានលើកឡើងថា ក្រោមភាពជាដៃគូនេះ អាម៉េរិកនិង​អង់គ្លេស​នឹង​ផ្តល់​ឱ្យ​អូស្ត្រាលីបច្ចេកវិទ្យាក្នុងការផលិតនាវាមុជទឹកដើរដោយថាមពលនុយក្លេអ៊ែរ។

 

 

ប៉ុន្តែមេដឹកនាំទាំងបីក៏សង្កត់ធ្ងន់ថា នាវាមុជទឹកថ្មីរបស់អូស្ត្រាលី នឹងមិនបំពាក់អាវុធនុយក្លេអ៊ែរឡើយ។ លោក បៃឌិន បញ្ជាក់ដែរថា អូស្ត្រាលីមាននាវាមុជទឹកដើរដោយថាមពលនុយក្លេអ៊ែរ នឹងជួយអូស្ត្រាលីមានសមត្ថភាពទំនើបបំផុតដែលចាំបាច់ក្នុងការទប់ទល់ការគំរាមកំហែងដែលប្រែប្រួលឆាប់រហ័ស។ 

 

«យើងទាំងអស់គ្នាទទួលស្គាល់ពីភាពចាំបាច់នៃការធានាសន្តិភាពនិងស្ថិរភាពនៅឥណ្ឌូ-ប៉ាស៊ីហ្វិកក្នុង​រយៈពេលវែង»។ ប្រធានាធិបតីអាម៉េរិកសង្កត់ធ្ងន់បែបនេះ។ លោកក៏លើកឡើងដែរថា​ ភាគី​ទាំងអស់​ត្រូវតែដោះស្រាយស្ថានភាពសន្តិសុខបច្ចុប្បន្ននៅក្នុងតំបន់នេះ ពីព្រោះភាពរីកចម្រើនៃ​ពិភពលោក​នៅ​ពេលអនាគតអាស្រ័យលើការបើកចំហ និងសេរីភាពនៃតំបន់ឥណ្ឌូ-ប៉ាស៊ីហ្វិក។

 

ទាក់ទងការសាងសង់នាវាមុជទឹកសម្រាប់អូស្ត្រាលីនេះ លោក បៃឌិន លើកឡើងថា រដ្ឋាភិបាល​ប្រទេស​ទាំងបីនឹងចំណាយពេល១៨ខែដើម្បីពិគ្រោះយោបល់អំពីការកំណត់ធាតុនីមួយៗក្នុងកម្មវិធីនេះ តាំងពី​កម្លាំងពលកម្ម តម្រូវការបណ្តុះបណ្តាល រហូតដល់ពេលវេលាផលិតផងដែរ។ បើតាមលោក ម៉ូ​រី​សុន នាវាមុជទឹកទាំងនេះ នឹងត្រូវសាងសង់នៅទីក្រុង Adelaide ហើយអូស្ត្រាលីសន្យាបំពេញតាមកាតព្វកិច្ចមិនរីកសាយភាយនៃអាវុធនុយក្លេអ៊ែរ។

 

ចំណែកលោក ចនសុន បានបញ្ជាក់ថា នេះជាការសម្រេចចិត្តដ៏សំខាន់មួយសម្រាប់ អូស្ត្រាលី​ក្នុង​ការ​ទទួលបានបច្ចេកវិទ្យាផលិតនាវាមុជទឹកដើរដោយថាមពលនុយក្លេអ៊ែរ។ លោកនិយាយទៀតថា ការមាននាវាមុជទឹកនេះនឹងធ្វើឱ្យពិភពលោកមានសុវត្ថិភាព។

 

ច្បាស់ណាស់ចិនមិនសប្បាយចិត្តនឹងរឿងនេះឡើយ។ ប៉ុន្តែអ្នកដែលមិនរីករាយខ្លាំងដែរនោះ គឺបារាំង។ នេះក៏ព្រោះបារាំងកំពុងចរចាជាមួយអូស្ត្រាលីលើការសាងសង់នាវាមុជទឹកតម្លៃរាប់ពាន់លានដុល្លារផងដែរ។ ក្រុមហ៊ុនបារាំង Naval Group បានបង្ហាញការខកចិត្តចំពោះគំនិតផ្ដួចផ្ដើមខាងលើ ដែលទំនងជាធ្វើឱ្យបារាំងបាត់ឱកាសរកស៊ីរបស់ខ្លួន៕