ក្នុងកិច្ចសម្ភាសជាមួយទីភ្នាក់ងារព័ត៌មាន Reuters លោក Budi Gunadi Sadikin រដ្ឋមន្ត្រីសុខាភិបាលឥណ្ឌូណេស៊ី បានបង្ហាញពីផែនការប្រកបដោយមហិច្ឆតារបស់រដ្ឋាភិបាលឥណ្ឌូណេស៊ីក្នុងការដើរតួជាទីតាំងចែកចាយវ៉ាក់សាំងជំងឺកូវីដ-១៩ ។ ជាគោលការណ៍អាទិភាព លោក Budi និយាយថា ឥណ្ឌូណេស៊ីចង់ទិញវ៉ាក់សាំងពីក្រុមហ៊ុនដែលអាចផ្ទេរបច្ចេកវិទ្យា ហើយបង្កើតរោងចក្រផលិតវ៉ាក់សាំងក្នុងស្រុកតែម្ដង។

 

រដ្ឋមន្រ្តីសុខាភិបាលឥណ្ឌូណេស៊ីរូបនេះបន្ថែមថា ឥណ្ឌូណេស៊ីមានមហិច្ឆតាផលិតវ៉ាក់សាំងដោយប្រើបច្ចេកវិទ្យានាំសារ mRNA មាន Pfizer-BioNTech និងបច្ចេកវិទ្យា viral vector របស់ AstraZeneca ។ យ៉ាងណាមិញ ការស្នើសុំនេះស្ថិតនៅជំហានដំបូងប៉ុណ្ណោះ។

 

«យើងកំពុងធ្វើការជាមួយ WHO ដើម្បីក្លាយជាមជ្ឈមណ្ឌលផលិតកម្មសកលសម្រាប់ (វ៉ាក់សាំងប្រើ ប្រាស់) បច្ចេកវិទ្យានាំសារ mRNA»។ លោក Budi បាននិយាយបែបនេះមុនបន្តថា នៅដើមខែកញ្ញា លោកបានបញ្ចុះបញ្ចូលអគ្គនាយកអង្គការសុខភាពពិភពលោក Tedros Adhanom Ghebreyesus ដោយផ្ទាល់អំឡុងដំណើរទស្សនកិច្ចរបស់លោកទៅកាន់ទ្វីបអឺរ៉ុប។ ដោយសារ WHO ជ្រើសរើសអាហ្វ្រិកខាងត្បូងជាទីតាំងដំបូង ឥណ្ឌូណេស៊ីគួរជាទីតាំងទីពីរ។
 

រដ្ឋមន្ត្រីរូបនេះបានអះអាងទៀតថា ឥណ្ឌូណេស៊ី មានទីតាំងល្អក្នុងការនាំចេញវ៉ាក់សាំងទៅជុំវិញពិភពលោក ជាពិសេសដោយសារប្រទេសនេះមានប្រជាជនមូស្លីមច្រើនជាងគេបំផុតផងដែរ ហើយអាចធានាបានថាវ៉ាក់សាំងដែលផលិតបាននឹងត្រូវគោរពតាមស្តង់ដា Halal ។

 

លើសពីនេះ លោក Budi បាននិយាយថា ក្រុមហ៊ុនឱសថឥណ្ឌូណេស៊ី កំពុងពិភាក្សាជាមួយក្រុមហ៊ុន ផលិតវ៉ាក់សាំងនានាដូចជា Anhui, Walvax, Sinovac, Genexine, Arcturus Therapeutics និង Novavax ។ លោក Bambang Heriyanto លេខាធិការសាជីវកម្ម Bio Farma ដែលជាក្រុមហ៊ុនផលិតឱសថរដ្ឋធំជាងគេរបស់ឥណ្ឌូណេស៊ី បញ្ជាក់ថា នេះជាជំហានដំបូងនៃការផ្ទេរបច្ចេកវិទ្យាផលិតហើយនេះអាចចំណាយពេលពីរទៅបីឆ្នាំដើម្បីសាងសង់រោងចក្រដែលមានដំណើរការពេញលេញ។

 

ជុំវិញរឿងនេះអ្នកនាំពាក្យរបស់ WHO បាននិយាយថាឥណ្ឌូណេស៊ីជាប្រទេសមួយក្នុងចំណោមប្រទេសមានចំណូលទាបនិងមធ្យម២៥ដែលចាប់អារម្មណ៍ក្នុងការធ្វើជាម្ចាស់ផ្ទះមជ្ឈមណ្ឌលផលិតវ៉ាក់សាំង។ ប៉ុន្តែអ្នកនាំពាក្យរូបនោះបានបដិសេធមិននិយាយថា ឥណ្ឌូណេស៊ីជាប្រទេសឈានមុខគេឬយ៉ាងណានោះទេ៕