កីឡាអន្តរជាតិ
អន្តរជាតិ
Ozil ស៊ុតគ្រាប់បាល់ដំបូងនៅអឺរ៉ុបក្នុងពេល៣ឆ្នាំ ក្រោយចេញពី Arsenal ទៅ Fenerbahce
× Mesut Ozil រកបានគ្រាប់បាល់ដំបូងនៅក្របខណ្ឌអឺរ៉ុបក្រោយរយៈពេល៣ឆ្នាំ ក្នុងជំនួបដែល Fenerbahce ស្មើ Eintracht Frankfurt ១-១ ក្នុងការប្រកួតពានរង្វាន់ EUFA Europa League។
នាការប្រកួតបើកឆាកវគ្គសន្សំពិន្ទុពូល D អតីតខ្សែបម្រើឆ្នើម Arsenal រូបនេះ បានស៊ុតបាល់បញ្ចូលទីនៅនាទី១០ ដើម្បីជួយក្រុមភ្ញៀវ Fenerbahce របស់តួកគីនាំមុខ Frankfurt ១គ្រាប់មុខ មុនពេល Sam Lammers តាមបានស្មើវិញនៅនាទី៤១។
នេះជាគ្រាប់បាល់ដំបូងរបស់ Ozil នៅក្របខណ្ឌអឺរ៉ុបក្នុងរយៈពេល៣ឆ្នាំ ចាប់តាំងពីរូបគេមិបានបង្ហាញខ្លួនសោះកាលនៅ Arsenal។ អតីតខ្សែបម្រើក្រុមជម្រើសជាតិអាល្លឺម៉ង់វ័យ ៣២ឆ្នាំរូបនេះ មានបញ្ហាជាច្រើនក្នុងវិស័យបាល់ទាត់ ដោយសារមានជាប់ពាក់ព័ន្ធនឹងនយោបាយ។
ក្រុមកាំភ្លើងធំ មិនបានដាក់ឱ្យ Ozil លេងស្ទើពេញមួយរដូវកាល ២០១៩-២០ ហើយនៅរដូវកាល ២០២០-២១ រូបគេក៏មិនជាប់ឈ្មោះសមាជិកកីឡាករទាំង២៥រូបរបស់លោក Mikel Arteta សម្រាប់ក្របខណ្ឌ Premier League និង Europa League ផងដែរ។ បញ្ហានេះត្រូវបានគេជឿជាក់ថាដោយសារអតីតខ្សែបម្រើ Real Madrid និយាយប៉ះពាល់ចិនជុំវិញករណីជនជាតិវីហ្គ័រនៅស៊ីនជាំង។ ទីផ្សាររបស់ Arsenal មួយចំនួនធំពឹងផ្អែកនៅប្រទេសចិន។
Ozil បានផ្លាស់ទៅ Fenerbahce នៃលីគកំពូលតួកគី កាលពីខែមករា ឆ្នាំ២០២១ ក្រោយរួមរស់ជាមួយ Arsenal ជិត៨រដូវកាល។ គ្រាប់បាល់នៅ Europa League ក៏ជាគ្រាប់បាល់ទី១សម្រាប់រូបគេ ក្រោយបង្ហាញខ្លួន១២លើកសម្រាប់ Fenerbahce។
ក្នុងពូល D នេះដែរក្រុម Olympiakos Piraeus បានយកឈ្នះ Royal Antwerp FC ក្នុងលទ្ធផល ២-១។ Olympiakos ឈរកំពូលតារាងពូល D មាន៣ពិន្ទុ ខណៈFenerbahce នៅលេខមាន១ពិន្ទុ ស្មើក្រុមលេខ៣ Frankfurt ឯ Royal Antwerp FC នៅបាតតារាង ក្រោយឆ្លងកាត់១ប្រកួតដំបូងដូចគ្នា៕
Tag:
Fenerbahce
Mesut Ozil
© រក្សាសិទ្ធិដោយ thmeythmey.com