នៅខែមិថុនាកន្លងមក អូស្រ្តាលី បានដាក់ពាក្យបណ្ដឹងទៅកាន់អង្គការពាណិជ្ជកម្មពិភពលោក (WTO) ពាក់ព័ន្ធនឹងការដំឡើងពន្ធនាំចូលស្រាពីសំណាក់ចិន។ យ៉ាងណាមិញ មកដល់ថ្ងៃទី១៦ ខែកញ្ញា រយៈពេលនៃការចរចាលើការដោះស្រាយជម្លោះពាណិជ្ជកម្មរវាងប្រទេសទាំងពីរ បានបរាជ័យ។ នេះជាដំណាក់កាលដំបូងនៃការដោះស្រាយជម្លោះពាណិជ្ជកម្មរវាងប្រទេសទាំងពីរ នៅអង្គការ WTO។ 

 

បន្ទាប់ពីបរាជ័យនៅដំណាក់កាលដំបូង អូស្រ្តាលី បានស្វះស្វែងរកទៅកាន់ដំណាក់កាលបន្ទាប់ទៀត ដែលជាការស្នើសុំឱ្យអង្គការអន្តរជាតិមួយនេះ បង្កើតក្រុមការងារដើម្បីដោះស្រាយជម្លោះ។ «អូស្រ្តាលីគាំទ្រប្រព័ន្ធពាណិជ្ជកម្មដែលផ្អែកលើប្រព័ន្ធច្បាប់»។ លោក Dan Tehan រដ្ឋមន្រ្តីពាណិជ្ជកម្មអូស្រ្តាលី បានសង្កត់ធ្ងន់បែបនេះនៅក្នុងសេចក្តីថ្លែងការណ៍មួយចេញនៅយប់ថ្ងៃទី១៦ ខែកញ្ញា។ 

 

រដ្ឋមន្រ្តីរូបនេះ ក៏បានបន្តផងដែរថា អូស្រ្តាលី នឹងបន្តតតាំងសម្រាប់សិទ្ធិរបស់អ្នកនាំចេញស្រាអូស្រ្តាលី និងត្រៀមខ្លួនដោះស្រាយបញ្ហាដោយផ្ទាល់ជាមួយចិន។ តាមទិន្នន័យឧស្សាហកម្មរបស់អូស្រ្តាលី ទំហំនៃការលក់ស្រារបស់អូស្រ្តាលីទៅចិន បានធ្លាក់ចុះជាលំដាប់ ដោយវាបានធ្លាក់ចុះពីជាង ៨៤០លានដុល្លារ មកចំនួនតិចតួចប៉ុណ្ណោះ។ ការធ្លាក់ចុះនៃទំហំលក់នេះ ធ្វើឡើងបន្ទាប់ពីចិនដំឡើងពន្ធលើស្រាអូស្រ្តាលី។

 

ក្រៅពីស្រា រដ្ឋាភិបាលក្រុងកង់បេរ៉ា ក៏បានតតាំងជាមួយក្រុងប៉េកាំងលើស្រូវបាលីនៅអង្គការពាណិជ្ជកម្មពិភពលោកផងដែរ និងបដិសេធការដំឡើងពន្ធលើទំនិញផ្សេងទៀត៕